నటించమంటే ప్రాణమే పోయింది..

వారిద్దరూ రెండేళ్లుగా ప్రేమించుకుంటున్నారు. ఒకే ఊరు కావడంతో వారి ప్రేమ విషయం ఇరువురి కుటుంబాలకు తెలుసు. ఏమైందో ఏమో... ఉన్నఫలంగా అమ్మాయికి వేరే వ్యక్తితో వివాహం నిశ్చయించారు. ఎలాగైనా పెళ్లి ఆపాలని అమ్మాయి.... ప్రేమించిన యువకునికి ఫోన్​ చేసింది. పురుగుల మందు తాగినట్లు నటించి నిశ్చితార్థం ఆపాలని ఆమె యువకుడిని కోరింది. అప్పటికే నిశ్చయ తాంబూలం పూర్తవడంతో మనస్తాపానికి గురైన యువకుడు బలవన్మరణానికి పాల్పడ్డాడు. ఈ విషాద ఘటన నల్గొండ జిల్లాలో చోటుచేసుకుంది.

ప్రేమించిన యువతికి వేరే వ్యక్తితో వివాహం నిశ్చయమైందని... మనస్తాపానికి గురై ఓ యువకుడు బలవన్మరణానికి పాల్పడిన ఘటన నల్గొండ జిల్లాలో చోటుచేసుకుంది. అనుముల మండలం చింతగూడెం గ్రామానికి చెందిన కదిరే కోటి రాములు(21) అనే వ్యక్తి... అదే గ్రామానికి చెందిన యువతి రెండేళ్లుగా ప్రేమించుకుంటున్నారు. వారి ప్రేమ విషయం ఇరు కుటుంబాలకు తెలుసు. అనుకోకుండా ఆ అమ్మాయి తల్లిదండ్రులు అబ్బాయిపై కొద్ది నెలల కిందట హాలియా పోలీసు స్టేషన్​లో ఫిర్యాదు చేయడంతో... ఇరువురికి పోలీసులు కౌన్సిలింగ్ ఇచ్చారు.

ఈ నెల 19న ఆ అమ్మాయికి వేరొకరితో వివాహం నిశ్చయించారు. దీంతో ఆ యువతి, ఆమె తల్లి... కోటి రాములుకు ఫోన్​ చేసి నిశ్చితార్థం ఆపాలని కోరారు. దానికోసం పురుగుల మందు తాగినట్లు నటించి నిశ్చయ తాంబూలం ఆపాలని అతనితో చెప్పారు. కాని ఈనెల 21న రాత్రి 11 గంటల సమయంలో నిజంగానే పురుగుల మందు తాగి ఆత్మహత్యాయత్నం చేశాడు రాములు.

అప్పటికే అపస్మారక స్థితిలో ఉన్న కోటి రాములును మిర్యాలగూడకు తరలింస్తుండగా మార్గం మధ్యలో మృతి చెందినట్లు అతని కుటుంబ సభ్యులు తెలిపారు. ప్రేమ వ్యవహారంలో అమ్మాయి, ఆమె తల్లి కలిసి ఫోన్​లో పురుగుల మందు తాగమని సలహా ఇవ్వడం వల్లే... తన కుమారుడు చనిపోయాడని మృతుని తండ్రి పోలీసులకు ఫిర్యాదు చేశాడు.

ఇదీ చదవండి: 'ఐడీ కార్డులు చూడకుండా పోలీసులు లాఠీలకు పని చెప్పొద్దు'