ఓ వ్యక్తి క్షణికావేశంతో కనిపెంచిన తల్లినే పొట్టనబెట్టుకున్న ఘటన వనపర్తి జిల్లాలో జరిగింది. గోపాల్‌పేట మండలం పొలికెపాడుకు చెందిన మంకలి నర్సయ్య - కాశమ్మ దంపతులకు కుర్మయ్య, శివ కుమారులున్నారు. చిన్నకుమారుడు శివకు అదే గ్రామానికి చెందిన రేణుకతో కొన్ని నెలల క్రితం వివాహమైంది. అప్పటి నుంచి తల్లిదండ్రులిద్దరూ శివ వద్దనే ఉంటూ జీవనం సాగిస్తున్నారు.
ఈ క్రమంలో శివ భార్య రేణుకకు, అతని తల్లి కాశమ్మకు మధ్య కొన్ని రోజులుగా తగాదాలు మొదలయ్యాయి. శుక్రవారం రాత్రి కూడా అత్తాకోడలు గొడవ పడడంతో కాశమ్మ ఇంట్లో నుంచి బయటకు వెళ్లి పోయింది. కాసేపటి తర్వాత ఆమె తిరిగి ఇంటికి రావడంతో మరోసారి వారి మధ్య గొడవ మొదలైంది. ఆ సమయంలో కాశమ్మ ఒంటిపై కిరోసిన్ పోసుకుని నిప్పంటించుకునే ప్రయత్నం చేసింది.
అది గమనించిన కోడలు రేణుక... కాశమ్మ చేతిలోని అగ్గి పెట్టెను లాక్కుంది. వారి గొడవ కారణంగా తీవ్ర కోపోద్రిక్తుడైన కుమారుడు శివ గొడ్డలితో తల్లి మెడపై నరికాడు. దాంతో ఒక్కసారిగా కుప్పకూలిన కాశమ్మ రక్తపు మడుగులో కొట్టుకుంటూ అక్కడికక్కడే మృతిచెందింది. సమాచారం అందుకున్న పోలీసులు ఘటనా స్థలానికి చేరుకుని నిందితున్ని అదుపులోకి తీసుకున్నారు. కేసు నమోదు చేసి దర్యాప్తు చేస్తున్నట్లు వనపర్తి డీఎస్పీ కిరణ్ కుమార్ తెలిపారు.
ఇదీ చదవండి: బంగాల్ ఎన్నికల ప్రచారంపై మరిన్ని ఆంక్షలు
