హైదరాబాద్ మహా నగరంలో కొందరు కేటుగాళ్లు బ్యాంక్ ఏటీఎం(ATM) కేంద్రాల్లో డబ్బులు డిపాజిట్ చేసే యంత్రాల నుంచి సొమ్ము కొల్లగొడతున్నారు. ఇటీవల ఎస్బీఐ(SBI) బ్యాంకుకు సంబంధించిన ఏటీఎం కేంద్రాలనే లక్ష్యంగా చేసుకుని నగదు కాజేస్తున్నారు. జూన్ 19న నల్లకుంట పోలీసులకు ఓ ఫిర్యాదు అందింది. విద్యానగర్‌లోని ఏటీఎం సెంటర్లోని డిపాజిట్ యంత్రం నుంచి రూ.50 వేలు మాయం అయ్యాయని ఎస్బీఐ అధికారులు ఫిర్యాదు చేశారు. కేసు నమోదు చేసిన పోలీసులు దర్యాప్తులో భాగంగా జూన్ 18న ఘటన జరిగినట్లు గుర్తించారు. ఉదయం 9 గంటల సమయంలో వచ్చిన ఇద్దరూ.. డిపాజిట్ యంత్రం వద్ద చాలా సేపు ఉన్నట్లు గుర్తించారు. ఈ కేసులో 5 సార్లు రూ.50వేలు మాయం అయినట్లు గుర్తించారు.
దేశవ్యాప్తంగా మోసాలు
హరియాణా నుంచి వచ్చిన ఈ ఇద్దరూ.. అదే రోజు సైదాబాద్లో ఓ ఆటో మాట్లాడుకున్నారు. అక్కడ ఏటీఎం కేంద్రంలో డిపాజిట్ యంత్రం నుంచి రూ.1.24లక్షలు తస్కరించారు. అక్కడి నుంచి నాగోల్‌లోని మరో యంత్రంలో ప్రయత్నించగా అక్కడ డబ్బు రాకపోవడంతో ఉప్పల్ మీదుగా నల్లకుంట చేరుకున్నారు. విద్యానగర్ ఎస్బీఐ ఏటీఎంలో రూ.50వేలు కాజేశారు. ఆటో డ్రైవర్‌ను ప్రశ్నించగా వారు హరియాణా నుంచి వచ్చినట్లు చెప్పారని....ఆటోకు రూ.600 కిరాయి ఇచ్చి వెళ్లారని తెలిపారు. గత నెలలో చిక్కడపల్లి వీఎస్టీ వద్ద ఉన్న ఏటీఎం సెంటర్ నుంచి విడతల వారీగా 3లక్షలు మాయం అయ్యాయని....బ్రాంచి మేనేజర్ హైదరాబాద్ సైబర్ క్రైం పోలీసులకు ఫిర్యాదు చేశారు. తిరుమలగిరి పరిధిలోని మరో ఏటీఎం సెంటర్‌లో ఇదే తరహా ఘటన జరిగింది. కానీ దీనిపై ఎలాంటి ఫిర్యాదు అందలేదని పోలీసులు తెలిపారు. కేవలం హైదరాబాద్‌లోనే కాదు దేశవ్యాప్తంగా హరియాణా ముఠా ఈ తరహా నేరాలకు పాల్పడుతోంది.
అసలు అంత ధైర్యంగా నగదు ఎలా తీస్తున్నారు?... ఖాతాలో డబ్బు ఎందుకు కట్ అవ్వట్లేదు అనే కోణంలో దర్యాప్తు చేసిన పోలీసులకు విస్తుపోయే విషయాలు తెలిశాయి.
'నిందితులు తమ వద్ద ఉన్న ఏటీఎం కార్డును డిపాజిట్ యంత్రంలో పెడతారు. నగదు ఖాతా నుంచి తీసినట్లుగా ఆపరేట్ చేస్తారు. నగదుతో బాక్స్ తెరుచుకుంటుంది. కానీ ఈ నేరగాళ్లు ఆ బాక్సును పూర్తిగా తెరుచుకోనివ్వకుండా మధ్యలోనే చేతితో ఆపేస్తున్నారు. తెరుచుకున్న కొద్దిసందులో నుంచి నగదును తీసుకుంటారు. ఎక్కువ సేపు బాక్స్ డోర్ ఆగిపోవడంతో సాంకేతిక సమస్య ఉందని తిరిగి మళ్లీ లోపలికి వెళ్లిపోతుంది. దీంతో ట్రాన్సాక్షన్ ఫెయిల్ అని ఖాతాలో కట్ అయిన నగదు తిరిగి జమ అవుతుంది.'
-పోలీసులు
గత నెలలో ఇదే తరహా ముఠాను చెన్నై పోలీసులు అరెస్ట్ చేశారు. 38 మంది ఈ ముఠాలో ఉన్నట్లు గుర్తించారు. చెన్నైతో పాటు దిల్లీ, ముంబయి, తిరువనంతపురం, హైదరాబాద్‌లో ఈ తరహా చోరీలకు పాల్పడుతున్నట్లు గుర్తించారు. ఈ ముఠా హరియాణాలోని మేవత్ పరిసర ప్రాంతాలకు చెందినదిగా తేల్చారు. చెన్నైలో మొత్తం రూ.5కోట్ల మేర చోరీకి పాల్పడినట్లు అక్కడి పోలీసులు గుర్తించారు. చోరీ చేసిన డబ్బులును వివిధ ఖాతాలకు మళ్లీంచుకున్నట్లు తేల్చారు. హైదరాబాద్‌లో ఇప్పటివరకూ మూడు ఫిర్యాదు అందాయి. వీరి కోసం పలు రాష్ట్రాల పోలీసులు గాలిస్తున్నారు.
ఇదీ చదవండి: ఈ ఆర్థిక సంవత్సరంలో రాష్ట్ర ప్రభుత్వం చేసిన అప్పు ఎంతో తెలుసా?
