బుడిబుడి అడుగులేస్తూ.. వచ్చీరాని మాటలతో.. అప్పుడప్పుడే అమ్మా అని పిలిచిన ఆ పిలుపు మూగబోయింది. అమ్మకు అమ్మ.. అమ్మమ్మ చెంత అమ్మను మించిన ప్రేమను పొందిన ఆ పసివాడు.. మృత్యువు కూడా ఆమె రూపంలోనే వస్తుందని ఊహించలేదు. కన్న కూతురిపై ఆమెకున్న ప్రేమ.. ఆ బాలుడి పాలిట శాపమైంది. సరిగ్గా నడవడం కూడా రాని.. ఆ బుజ్జిబాబును కర్కశంగా హతమార్చేలా చేసింది.
రెండో పెళ్లికి అడ్డుగా ఉన్నాడని..
సంగారెడ్డిలో అమానవీయ ఘటన చోటుచేసుకుంది. సొంత మనవడినే అమ్మమ్మ హతమార్చింది. రెండేళ్ల క్రితం బాలుడు యశ్వంత్ తండ్రి మృతి చెందారు. భర్త చనిపోయిన కుమార్తె.. రెండో పెళ్లి చేయాలని ఆ మహిళ నిర్ణయించింది. ఈ క్రమంలోనే పలు సంబంధాలు వచ్చాయి. కానీ వచ్చినవారంతా బాబును సాకుగా చూపి పెళ్లికి నిరాకరించారు. తన కుమార్తె రెండో పెళ్లికి రెండేళ్ల మనవడే అడ్డుగా ఉన్నాడని భావించిన మహిళ.. మరో వ్యక్తి సాయంతో కర్కశంగా ఆ పసికందును హతమార్చింది.
చెరువులో మృతదేహం..
గురువారం రోజున సంగారెడ్డిలో యశ్వంత్ అదృశ్యమయ్యాడు. బంధువుల ఫిర్యాదు మేరకు కేసు నమోదు చేసుకున్న పోలీసులు బాలుడి కోసం గాలింపు మొదలుపెట్టారు. శుక్రవారం మధ్యాహ్నం.. బొబ్బిలకుంట చెరువులో ఓ చిన్నారి మృతదేహం గుర్తించిన స్థానికులు పోలీసులకు సమాచారం అందించారు. ఘటనాస్థలికి చేరుకున్న పోలీసులు.. ఆ మృతదేహం యశ్వంత్దేనని నిర్ధారించారు. అనంతరం అతడి తల్లి, అమ్మమ్మను విచారించగా.. అసలు విషయం బయటపడింది. తన కుమార్తె రెండో పెళ్లికి అడ్డుగా ఉన్నాడనే.. మనవడిని హతమార్చినట్లు నిందితురాలు అంగీకరించినట్లు తెలుస్తోంది.
