బంగారం దొంగతనం చేశావని అవమానించడంతో కూలీ ఆత్మహత్య

అవమానం భరించలేక ఓ వ్యక్తి ఆత్మహత్య చేసుకున్న ఘటన బోయిన్​పల్లి పోలీస్​ స్టేషన్​ పరిధిలో చోటుచేసుకుంది. ఓ ఇంట్లో పెయింటింగ్​ వేస్తుండగా అక్కడ బంగారు ఆభరణం దొంగతనం చేశావని యజమాని నిందించడంతో బలవన్మరణానికి పాల్పడ్డాడు.

బంగారం దొంగతనం చేశావనే అవమానం భరించలేక ఓ వ్యక్తి ఆత్మహత్య చేసుకున్న ఘటన మేడ్చల్​ మల్కాజ్​గిరి జిల్లా బోయిన్​పల్లి పోలీస్ స్టేషన్ పరిధిలో చోటు చేసుకుంది. బాపూజీనగర్​లో నివాసం ఉండే సాయికుమార్​చారి(31) క్యాబ్ డ్రైవర్​గా పనిచేస్తూ జీవనం సాగిస్తున్నాడు. క్యాబ్ సరిగా నడవకపోవడంతో ప్రస్తుతం పెయింటింగ్ వర్క్ కాంట్రాక్టర్ దగ్గర రోజువారీ కూలీగా పనిచేస్తున్నాడు. ఈ క్రమంలో బోయిన్​పల్లిలోని ఓ ఇంట్లో సాయికుమార్.. వారం రోజుల క్రితం పనికోసం వెళ్లాడు. ఆ సమయంలో ఆ ఇంట్లో 2 గ్రాముల బంగారు ఆభరణం పోయింది. దీంతో ఆ ఇంటి యజమాని.. ఈ దొంగతనం అతనే చేశాడని అనుమానంతో చారిని ప్రశ్నించాడు. అవమానంగా భావించిన సాయికుమార్​చారి.. ఆ ఆభరణం విలువ సొమ్మును ఆదివారంలోపు ఇస్తానని ఒప్పుకున్నాడు.

డబ్బులు సర్దుబాటు కాకపోవడంతో మళ్లీ అవమానం పాలుకావడం ఇష్టం లేక ఈరోజు తెల్లవారుజామున.. ఇంట్లో ఫ్యాన్​కు ఉరేసుకుని బాధితుడు బలవన్మరణానికి పాల్పడ్డాడు. మృతుడి బంధువుల ఫిర్యాదు మేరకు కేసు నమోదు చేసుకున్న పోలీసులు దర్యాప్తు చేస్తున్నారు. పోస్టుమార్టం అనంతరం మృతదేహాన్ని బంధువులకు అప్పగించారు.

ఇదీ చదవండి: జిల్లాలో దొంగల హల్​చల్​