ఈకాలం పిల్లలు.. యమా స్పీడ్గా ఉన్నారు. కనీసం మాటలు కూడా సరిగా పలకలేని చిన్నారులు సైతం.. సెల్ఫోన్లతో ఓ ఆట ఆడేసుకుంటున్నారు. చేతిలో మొబైల్ లేకపోతే నోట్లో ముద్ద కూడా పెట్టుకోనంతగా అలవాటు పడిపోయారు. అదేంటో.. పెద్దలకు కూడా తెలియని మొబైల్ ఆపరేటింగ్.. పిల్లలకు అలవోకగా తెలిసిపోతుంది. వాట్స్ప్లో వీడియోకాల్స్ చేసి మాట్లాడటం.. యూట్యూబ్లో నచ్చిన పాటలు పెట్టుకుని డ్యాన్సులు వేయటం.. ప్లేస్టోర్లో మంచిమంచి గేమ్లు ఇన్స్టాల్ చేసి ఆడుకోవటం.. ఇలా చరవాణిలో ఎన్ని ఫీచర్లుంటే అన్నింటినీ ఇట్టే ఒంటపట్టించుకుని అందులో ఆరితేరిపోతున్నారు. అలాంటి ఓ చిచ్చరి పిడుగు.. తాత మొబైల్లో గేమ్ ఆడి ఏకంగా 36 లక్షలు మాయం చేశాడు. ఈ ఆసక్తికర ఘటన.. హైదరాబాద్ అంబర్పేటలో చోటుచేసుకుంది.
హైదరాబాద్ అంబర్పేటకు చెందిన ఓ విశ్రాంత పోలీస్.. ఇటీవలే మరణించారు. అయితే ఇన్ని రోజులు వాడిన మొబైల్.. ఆయన మరణం తర్వాత ఖాళీగానే ఉంది. అది గమనించింన కుమార్తె కొడుకు దాన్ని వాడటం ప్రారంభించాడు. తల్లిదండ్రులను అడిగితే ఎప్పుడూ విసుక్కోవటం వల్ల.. ఖాళీగా ఉన్న తాత మొబైల్ దొరకగానే కోట్లు సంపాదించినంత ఆనందం ఆ మనువడి సొంతమైంది.
బాలునికి గేమ్స్ ఆడటం ఇష్టం ఉండటంతో.. నచ్చిన గేమ్ డౌన్లోడ్ చేసుకోవటం.. ఆడుకోవటం అలవాటే. అందులో భాగంగానే.. ఓ రోజు ఫ్రీఫైర్ గేమ్ను డౌన్లోడ్ చేసి ఆడటం మొదలుపెట్టాడు. సదరు గేమ్లో కొన్నిసార్లు.. ఆయా స్టేజ్లు దాటాలన్నా, ఆయుధాలు కావాలన్నా.. డబ్బులు చెల్లించాల్సి ఉంటుంది. ఆ సందర్భం మన బాలునికి తొందరగానే వచ్చింది. మొదటిసారి 1500 రూపాయలు పెట్టి గేమ్ ఆడాడు. అయితే.. మొబైల్లో డిజిటల్ పేమెంట్ యాప్స్తో పాటు నెట్బ్యాంకింగ్ను తాత రెగ్యులర్గా వాడి ఉండటం వల్లో.. లేక పాస్వర్డ్లు క్లిష్టంగా పెట్టకపోవటం వల్లో.. మన గేమింగ్ స్టార్కు పెద్దగా కష్టమేమి కలగలేదు. పేమెంట్ ప్రక్రియ సులభంగానే జరిగిపోయింది.
గేమ్లోని స్టేజ్లు తొందరతొందరగా దాటాలన్న ఆత్రుతతో పిల్లాడు.. తరచూ పేమెంట్లు చేస్తున్నే ఉన్నాడు. ఇలా.. 10 వేల చొప్పున 60 సార్లు నగదు పెట్టి గేమ్ ఆడాడు. ప్రతీసారి డబ్బు చెల్లించి ఆడుతుండటంతో గేమింగ్ సిబ్బంది.. మొబైల్లోని అకౌంట్పై కన్నేశారు. చరవాణిలో నెట్ బ్యాంకింగ్ ఉండటం వాళ్లకు కలిసొచ్చే అంశం కావటం వల్ల.. 10 వేలు కాకుండా ఈసారి పెద్ద మొత్తానికే టెండర్ వేశారు. 2 లక్షలు, లక్ష 95వేలు, లక్ష 60వేలు, లక్ష 45 వేలు, లక్ష 25 వేలు, 50 వేలు చొప్పున వేర్వేరు సందర్భాల్లో నగదు స్వాహా చేశారు. ఇలా.. మొత్తం కలిపి తాత అకౌంట్ నుంచి ఏకంగా 36 లక్షలు మాయమయ్యాయి.
ఇదిలా ఉంటే.. ఏదో అవసరం పడి నగదు డ్రా చేద్దామని సదరు బాలుడి కుటుంబసభ్యులు బ్యాంకుకు వెళ్లారు. నగదులో నిండుగా ఉండాల్సిన అకౌంట్.. నిల్ అని చూపించటంతో అవాక్కవటం వాళ్ల వంతైంది. ఆ షాక్ నుంచి తేరుకుని విషయంపై ఆరా తీయగా.. బ్యాంకు సిబ్బంది నగదు వివరాలు అందించగా... అసలు విషయం అవగతమైంది. ఆ షాక్ నుంచి తేరుకుని.. వెంటనే కుటుంబసభ్యులు సైబర్ క్రైం పోలీసులను ఆశ్రయించారు. కేసు నమోదు చేసుకున్న పోలీసులు.. దర్యాప్తు చేస్తున్నారు.
జెట్ స్పీడ్తో మారిపోతున్న ప్రపంచానికి తగినట్టు.. పిల్లలు అలవాట్లు ఉండటం ఓవైపు ఆనందం, మరోవైపు ఆశ్చర్యం కలిగిస్తున్నా.. ఇలాంటి ఘటనలు జరిగినప్పుడు మాత్రం భయపడాల్సి వస్తోంది. మొబైల్స్ని ఒంటి చేత్తో ఆటాడుకోవటం చూసి గొప్పలు చెప్పుకోవాలో.. దానికి బానిసై మిగతా వాటిని నిర్లక్ష్యం చేయడాన్ని చూసి బాధపడాలో తెలియని అయోమయంలో తల్లిదండ్రులు తలలుపట్టుకుంటున్నారు. పిల్లలు చురుకుగా ఉండటం ఒకింత సంతోషించదగ్గ విషయమే అయినప్పటికీ.. తల్లిదండ్రులు వాళ్లపై ఎప్పటికప్పుడు ఓ కన్నేసి ఉంచాలన్నది నిపుణుల సూచన. ఇలాంటిదేదో జరగక ముందే.. జాగ్రత్త పడటం మంచిదేగా మరి..!
ఇవీ చూడండి:
