యువకుల మితిమీరిన వేగం... బాలిక పరిస్థితి విషమం!

ట్రాఫిక్​ పోలీసులు ఎన్ని నిబంధనలు తీసుకొచ్చినా కొందరు గాలికొదిలేస్తున్నారు. జన సందడి అధికంగా ఉన్న ప్రాంతాల్లోనూ మితిమీరిన వేగంతో వాహనాలు నడుపుతూ ప్రాణాలతో చెలగాటం ఆడుతున్నారు. ఎస్సార్​నగర్​ పోలీస్​ స్టేషన్​ పరిధిలో అతివేగంగా దూసుకొచ్చిన ద్విచక్రవాహనం చిన్నారిని ఢీకొంది. బాలిక ఆస్పత్రిలో ప్రాణాపాయ స్థితిలో ఉంది.

మితిమీరిన వేగంతో వస్తున్న ద్విచక్ర వాహనం చిన్నారిని ఢీకొంది. ప్రస్తుతం బాలిక ప్రాణాపాయ స్థితిలో కొట్టుమిట్టాడుతోంది. హైదరాబాద్​ ఎస్సార్​నగర్ పోలీస్ స్టేషన్ పరిధిలోని బల్కంపేట ఎల్లమ్మ దేవాలయం సమీపంలో ఈ ఘటన జరిగింది.

ముగ్గురు పిల్లలను తీసుకొని ఓ తల్లి వెళ్తుండగా ముగ్గురు యువకులు ఉన్న ద్విచక్రవాహనం అతివేగంగా దూసుకొచ్చింది. రోడ్డు దాటుతున్న బాలికను ఢీ కొట్టి... ఆపకుండా ముగ్గురు యువకులు పరారయ్యారు. ఆ వాహనానికి ముందు వైపు నంబర్ ప్లేట్ లేదని పోలీసులు పేర్కొన్నారు. కేసు నమోదు చేసుకుని సీసీ ఫుటేజీ ఆధారంగా దర్యాప్తు చేస్తున్నట్లు వెల్లడించారు.

ఇదీ చదవండి: అమెరికాలో మోసం.. కళ్లుకప్పి.. కారేపల్లికి!