వికారాబాద్ జిల్లా బషీరాబాద్‌ మండలం మైల్వార్‌ అటవీ ప్రాంతంలో జంతువులను నాటు తుపాకులతో వేటాడుతున్న పది మంది వేటగాళ్లను టాస్క్ఫోర్స్ పోలీసులు పట్టుకున్నారు. వారి వద్ద నుంచి నాలుగు నాటు తుపాకులు, ఐదు ద్విచక్రవాహనాలు, 9 సెల్ఫోన్లను స్వాధీనం చేసుకున్నారు. అనంతరం వారిని బషీరాబాద్‌ ఠాణా పోలీసులకు అప్పగించారు.
కర్ణాటకలోని బొందెంపల్లి తండా, కొడంగల్‌ మండలం బోయపల్లి తండాకు చెందిన కొందరు వ్యక్తులు, నాటు తుపాకులతో నీళ్లపల్లి-మైల్వార్‌ అటవీ ప్రాంతంలో వేటాడుతున్నారని టాస్క్ఫోర్స్ పోలీసులకు సమాచారం అందింది. వేటగాళ్లను మాటువేసి పట్టుకున్న సిబ్బంది వారిని స్థానిక పోలీసులకు అప్పగించారు. నిందితులపై కేసు నమోదు చేసి దర్యాప్తు చేస్తున్నామని తాండూరు గ్రామీణ సీఐ జలంధర్ రెడ్డి తెలిపారు.
ఇదీ చదవండి: రాతల తండాలో వ్యక్తి దారుణ హత్య
