కొవిడ్ నిబంధనలు పాటిస్తూ వీసా ప్రాసెసింగ్ చేస్తున్నామని, విద్యార్థి వీసాలకు ప్రాధాన్యత ఇస్తున్నట్లు హైదరాబాద్లోని అమెరికా కాన్సులేట్ ప్రకటించింది. అమెరికాలో ఉన్నత చదువుల కోసం వెళ్లాలనుకుంటున్న విద్యార్థులకు ఉచిత అడ్వైజరీ సర్వీసులను అందిస్తున్నట్లు కాన్సూల్ జనరల్ జోయల్ రీఫ్ మాన్ వెల్లడించారు.
దేశంలో వై-యాక్సిస్ ఆధ్వర్యంలో నడిచే రెండో ఎడ్యుకేషన్ యూఎస్ఏ సెంటర్ను హైదరాబాద్లో వచ్చే ఏడాది మొదట్లో ప్రారంభించనున్నట్లు తెలిపింది. ఈ కేంద్రంలో నిపుణులు ఉంటారని.. వారు అమెరికాలో విద్య గురించి ఖచ్చితమైన, తాజా సమాచారం ఇస్తారని పేర్కొంది.
నవంబర్ 16 నుంచి 22 వరకు నిర్వహిస్తోన్న ఇంటర్నేషనల్ ఎడ్యూకేషన్ వీక్లో అమెరికాలో ఉన్నత విద్యపై అవగాహన కల్పించనున్నట్లు తెలిపింది. ఓపెన్ డోర్స్ పేరిట విడుదల చేసిన నివేదిక ప్రకారం 2019-20లో 2 లక్షల మంది అమెరికాలో చదువుకునేందుకు వెళ్లారని పేర్కొంది. అక్కడ చదువుకునే వారిలో 20 శాతం మంది భారతీయులేనని.. అండర్ గ్రాడ్యుయేట్ విద్యార్థుల సంఖ్య క్రమక్రమంగా పెరుగుతున్నట్లు కాన్సులేట్ వెల్లడించింది. గత పది సంవత్సరాల్లో అమెరికాలో చదువుకుంటున్న భారతీయ విద్యార్థుల సంఖ్య రెట్టింపు అయిందని తెలిపింది. దేశంలో వీసా ప్రాసెసింగ్ విషయంలో హైదరాబాద్లోని అమెరికా కాన్సులేట్ మొదటి స్థానంలో ఉందని వెల్లడించింది.
