తెలంగాణ రాష్ట్ర సమితి (trs party) జిల్లా కమిటీల నియామకం, ప్లీనరీపై త్వరలో నిర్ణయం తీసుకోనున్నట్లు పార్టీ కార్యనిర్వాహక అధ్యక్షుడు కేటీఆర్(KTR) వెల్లడించారు. పార్టీ జిల్లా శాఖ అధ్యక్షులను త్వరలో... గులాబీ బాస్, సీఎం కేసీఆర్(CM KCR) త్వరలో ప్రకటిస్తారని పార్టీ నేతలకు కేటీఆర్ తెలిపారు.
సంస్థాగత కమిటీల నిర్మాణంపై పార్టీ ప్రధాన కార్యదర్శులు, ఎమ్మెల్యేలతో కేటీఆర్(KTR) బుధవారం టెలీకాన్ఫరెన్స్ నిర్వహించారు. గ్రామ, మండల కమిటీలు పూర్తయ్యాయని ఎమ్మెల్యేలు.. కేటీఆర్(KTR)కు వివరించారు. ఇంకా ఎక్కడైనా నియమకాలు జరగాల్సి ఉంటే రేపటిలోగా పూర్తి చేయాలని కేటీఆర్.. పార్టీ నేతలకు సూచించారు. ఈనెల 24 నుంచి ఎమ్మెల్యేలు అసెంబ్లీ సమావేశాలకు హాజరవుతారు కాబట్టి... ఎల్లుండిలోగా కమిటీల వివరాలన్నీ రాష్ట్ర కార్యాలయానికి పంపించాలని కేటీఆర్ పేర్కొన్నారు.
అక్టోబరులో తెరాస ప్లీనరీ..
తెలంగాణ రాష్ట్ర సమితి ప్లీనరీ, పార్టీ ద్విదశాబ్ది బహిరంగ సభను అక్టోబరులో నిర్వహించనున్నారు. అదే నెలలో రాష్ట్ర కార్యవర్గం ఏర్పాటై సంస్థాగత ఎన్నికల ప్రక్రియ పూర్తి కానుంది. పార్టీ మండల కమిటీలను పూర్తి చేసి, ఆ తర్వాత జిల్లా కమిటీలపై దృష్టి సారిస్తారు. జిల్లా కమిటీలో ఒక ఉపాధ్యక్ష, మరో కార్యనిర్వాహక కార్యదర్శి పదవి మహిళలకు కేటాయిస్తారు. ఇందుకోసం పార్టీ నియమావళిలో మార్పులు చేశామని కేటీఆర్ ఇటీవలే ప్రకటించారు.
పార్టీ సంస్థాగత ఎన్నికల కమిటీల్లో 51 శాతం ఎస్సీ, ఎస్టీ, బీసీ, మైనార్టీలు, మహిళలకు అవకాశమివ్వాలని అధిష్ఠానం సూచించింది. అయితే అంతకంటే అధికంగా 75 శాతం వరకు ఇవ్వాల్సి వస్తోందని పార్టీ ప్రధాన కార్యదర్శులు కేటీఆర్‌కు వెల్లడించగా ఆయన స్వాగతించారు. దానిని ప్రోత్సహించాలని చెప్పారు.
హైదరాబాద్‌కు జిల్లా కమిటీయే...
హైదరాబాద్‌లో ఎన్నికలకు సంబంధించి కేటీఆర్ స్పష్టత ఇచ్చినట్లు తెలిసింది. రాష్ట్రంలో 33 జిల్లాలకు కమిటీల ఏర్పాటు చేయాలనేది సీఎం, పార్టీ అధ్యక్షుడు కేసీఆర్ నిర్ణయమని కేటీఆర్ వెల్లడించినట్లు సమాచారం. దీంతో జీహెచ్‌ఎంసీ పరిధిలో గాకుండా హైదరాబాద్ జిల్లాకే ప్రత్యేక కమిటీ ఏర్పాటవుతుందని పేర్కొన్నట్లు తెలిసింది. మరో రెండు రోజుల్లో జీహెచ్‌ఎంసీ పరిధిలోని మంత్రులు, ఎమ్మెల్యేలు, ప్రధాన కార్యదర్శులతో సమావేశమై ఈ నిర్ణయాన్ని అధికారికంగా వెల్లడించే వీలుంది.
ఇదీచూడండి: KTR: 80 శాతం వైద్య పరికరాలను దిగుమతి చేసుకుంటున్నాం
