మీ ఊళ్లో ప్లేట్‌ ఇడ్లీ ఎంత? పాతిక, ముప్ఫై, యాబ్బై, డెబ్బయి.. అబ్బో.. ఇలా ధర పెరుగుతూ పోతుందే తప్ప తగ్గడం లేదు కదా. ఈ రోజుల్లో బయట టిఫిన్‌ తినాలంటే జేబులో తక్కువలో తక్కువ పాతిక రూపాయిలైనా ఉండాల్సిందే. అలాంటిది రూపాయికే ఇడ్లీ... బజ్జీ అందిస్తూ దాదాపు పది రూపాయల్లో శుభ్రంగా కడుపు నిండేలా చేస్తున్నారు ఈ దంపతులు.
వీళ్లు అందిస్తున్న టిఫిన్ల గురించి తెలుసుకోవాలంటే తూర్పుగోదావరి జిల్లా పెద్దాపురం మండలం ఆర్‌బీ. కొత్తూరు గ్రామానికి వెళ్లాల్సిందే. ఆర్‌బీ. కొత్తూరు గ్రామం నుంచి సామర్లకోట మండలం వేట్లపాలెం వెళ్లే రహదారిలో షిర్డీసాయిబాబా గుడి ఉంది. దీని పక్కన ఆ గ్రామానికి చెందిన చిన్ని రత్నం లక్ష్మి(రాణి), చిన్ని రామకృష్ణ(రాంబాబు) దంపతులు ఇంటి బయట చిన్నపాటి కాకా హోటల్‌ నడుపుతున్నారు. వీరు గత 16 ఏళ్లుగా దీన్ని నిర్వహిస్తున్నారు. అప్పటి నుంచి ఇప్పటి వరకు కేవలం రూపాయికే ఇడ్లీ, మైసూరు బజ్జీలను అందిస్తున్నారు. ఈ హోటల్‌ను భార్యాభర్తలు, రామకృష్ణ అత్తగారు ముగ్గురూ కలిసి ఉదయం నాలుగు గంటల నుంచి 10 గంటల వరకు నిర్వహిస్తారు.
వీరే అన్ని పనులూ చేసుకుంటారు. ఉదయం అయిందంటే చాలు ఈ హోటల్‌కు జనం క్యూ కడతారు. నిత్యావసర వస్తువుల ధరలు రోజురోజుకీ మండిపోతున్నా అప్పటి నుంచి ఇప్పటి వరకు కేవలం రూపాయికే వీటిని ఎలా అందించగలుగుతున్నారన్న దానికి.. డబ్బు ఆర్జించడమేకాదు ఎంతో కొంత సమాజానికి ఈ రకంగా సేవ చేయాలనే దృక్పథంతో నిర్వహిస్తున్నామని అంటున్నారీ జంట. రోజుకు ఇక్కడికి సుమారు 500 మంది వినియోగదారుల వరకు వస్తారని ఆనందంగా చెబుతున్నారు.
ఇదీ చూడండి: polavaram: పోలవరం వరద కష్టాలు.. గ్రామాలను వదిలిపోతున్న నిర్వాసితులు
