తండ్రి ప్రాణం దక్కించుకోవాలని శతవిధాల ప్రయత్నించాడు. ఆస్పత్రిలో ఇతరులకు అనుమతి లేకపోవడంతో ఏకంగా స్వీపర్గా మారాడు. నాన్నను దగ్గరుండి చూసుకోవచ్చనుకున్న అతని ఆశలు అడియాసలే అయ్యాయి. తండ్రిని విగతజీవిలా చూసి కన్నీరుమున్నీరయ్యాడు. ఈ విషాద ఘటన విశాఖ జిల్లా అక్కయ్యాపాలెంలో జరిగింది. అక్కయ్యపాలేనికి చెందిన ఎ.మధుకిషన్‌ ఎంబీఏ చదివారు. రాష్ట్ర ప్రభుత్వానికి చెందిన 1902 స్పందన కాల్‌సెంటర్‌లో ఏడాదిన్నరగా పని చేస్తున్నారు. ఆయన తండ్రి సుదర్శనరావు (67) విశ్రాంత షిప్‌యార్డు ఉద్యోగి.
ఆయన కొవిడ్ బారిన పడడంతో ఈనెల 2న కేజీహెచ్‌లో చేర్పించారు. సీఎస్‌ఆర్‌ బ్లాక్‌ నాలుగో అంతస్తులోని ఐసీయూ పడకలో ఉంచి చికిత్స అందిస్తున్నారు. రెండు రోజుల తరువాత సుదర్శనరావు స్నానాల గదిలో పడిపోవడంతో దెబ్బతగిలి బాగా రక్తస్రావం అయింది. సిబ్బందికి చెప్పినా పట్టించుకోలేదు. ఈ విషయాన్ని ఆయన తన కుమారులకు ఫోన్‌ చేసి చెప్పారు. వారు కేజీహెచ్‌ సూపరింటెండెంట్‌, వైద్యులకు ఫిర్యాదు చేయడంతో దెబ్బలకు చికిత్స చేశారు.
అయితే అక్కడున్న సిబ్బంది తండ్రిని పట్టించుకోవడం లేదని మధుకిషన్‌కు తెలిసింది. తండ్రి ఆరోగ్యం కుదుటపడే వరకు ఆయన దగ్గర ఉండాలని అనుకున్నా బయటవారిని అనుమతించరని తెలిసి పారిశుద్ధ్య కార్మికుడిగా సోమవారం మధ్యాహ్నం ఆసుపత్రిలో చేరారు. రాత్రి 9.30 గంటలకు విధులకు వెళ్లారు. తండ్రి చికిత్స పొందుతున్న పడక వద్దకు వెళ్లి చూడగా కనిపించలేదు. వరండాలో పడిపోయి ఉన్నారు. ఆ దృశ్యం చూసి నిశ్చేష్టుడైౖ పోయారు మధుకిషన్‌. అదే వార్డులో ఉన్న ఓ వ్యక్తి వచ్చి ఆయన ఎప్పుడో చనిపోయాడని చెప్పడంతో బోరున విలపించారు.
సిబ్బందిపై ఫిర్యాదు...
ఆసుపత్రి నాలుగో ఫ్లోర్‌ సూపర్‌వైజర్‌, అక్కడి పనిచేసే సిబ్బంది నిర్లక్ష్యం వల్లే తన తండ్రి చనిపోయారని ఆరోపిస్తున్నారు. దీనిపై ఆసుపత్రి సూపరింటెండెంట్‌, సీఎస్‌ఆర్‌ బ్లాక్‌ ఇన్‌ఛార్జి, కలెక్టర్‌, పోలీస్‌ కమిషనర్‌కు మధుకిషన్‌ ఫిర్యాదు చేశారు. సోమవారం రాత్రి 8.30 గంటల సమయంలో తన తండ్రి పడిపోతే ఎవరూ పట్టించుకోలేదని ఫిర్యాదులో పేర్కొన్నారు.
* ఈ విషయమై కేజీహెచ్‌ సూపరింటెండెంట్‌ వద్ద ప్రస్తావించగా అతని ఫిర్యాదు తన దృష్టికి ఇంకా రాలేదన్నారు. ఇలాంటివి పునరావృతం కాకుండా చూస్తామని చెప్పారు. బాధ్యులపై చర్యలు తీసుకుంటామన్నారు.
ఇదీ చదవండి: లైవ్అప్డేట్స్: హైదరాబాద్‌లో కనిపిస్తున్న లాక్‌డౌన్‌ ప్రభావం
