అంతర్జాతీయ విమాన ప్రయాణికులను 14 రోజులపాటు క్వారంటైన్ నిమిత్తం ఏర్పాటు చేసిన గదుల్లో సరైన సదుపాయాలు లేకపోవడంపై హైకోర్టు స్పందించింది. ఈ గదుల్లో అసౌకర్యాలపై ప్రజాప్రయోజన వ్యాజ్యంగా పరిగణనలోకి తీసుకుంది. ఒకే గదిలో ఇద్దరు, ముగ్గురిని ఉంచుతున్నారని... శుభ్రత ఏమాత్రం లేదని... బొద్దింకలు, నల్లులు, దోమలున్నాయనే విషయాన్ని ప్రస్తావించింది. మరుగుదొడ్లలో సరైన నీటి సౌకర్యం లేదని, కనీసం తాగేందుకు నీరు సైతం లేకపోవడంపై పెదవి విరిచింది.
కేసులో ప్రభుత్వ ప్రధాన కార్యదర్శి, వైద్యారోగ్యశాఖ ముఖ్యకార్యదర్శి, కమిషనర్, డైరెక్టర్, వైద్య విధాన పరిషత్, పురపాలక శాఖ ముఖ్యకార్యదర్శి, జీహెచ్ఎంసీ కమిషనర్, స్టేట్ ఎపిడమిక్ సెల్ జాయింట్ డైరెక్టర్, కేంద్రం తదితరులను ప్రతివాదులుగా చేర్చింది. దీనిపై సోమవారం ప్రధాన న్యాయమూర్తితో కూడిన ధర్మాసనం విచారణ చేపట్టనున్నట్లు సమాచారం .
