"దిశ కేసు నిందితుల మృతదేహాలకు మళ్లీ పోస్టుమార్టం..!"

దిశ కేసు నిందితుల మృతదేహాలకు మళ్లీ పోస్టుమార్టం చేసేందుకు ఆదేశాలు జారీ చేస్తామని హైకోర్టు పేర్కొంది. దిల్లీకి చెందిన వైద్యనిపుణులతో బోర్డు ఏర్పాటు చేసి శవపరీక్ష జరిపిస్తామని వెల్లడించింది. రాష్ట్ర ప్రభుత్వం, పోలీసు, న్యాయవ్యవస్థ తీరును ప్రపంచమంతా చూస్తోందని.. నిజాయతీని, పారదర్శకతను చూపాల్సిన అవసరం ఉందని ధర్మాసనం వ్యాఖ్యానించింది.

దిశ కేసు నిందితుల మృతదేహాలకు దిల్లీకి చెందిన నిపుణులతో మళ్లీ శవపరీక్ష నిర్వహించాలని హైకోర్టు అభిప్రాయపడింది. మృతదేహాలను కుటుంబ సభ్యులకు అప్పగించాలని మానవ హక్కుల సంఘాల ప్రతినిధులు హైకోర్టును కోరారు. ఆధారాల సేకరణ కోసం ఆదేశాలు జారీ చేయాలని పేర్కొంటూ సుప్రీం ఇచ్చిన ఆదేశాలను సమర్పించారు.

సుప్రీం ఏం చెప్పిందంటే..?

1. సుప్రీంకోర్టు ఇచ్చిన ఆదేశాలు పరిశీలించిన ప్రధాన న్యాయమూర్తి జస్టిస్ ఆర్ఎస్ చౌహాన్, జస్టిస్ ఎ.అభిషేక్ రెడ్డిల ధర్మాసనం.. దిల్లీకి చెందిన నిపుణులతో వైద్య బోర్డు ఏర్పాటు చేసి మళ్లీ శవపరీక్ష జరిపిస్తామని పేర్కొంది.
2. ఇతర రాష్ట్రాల నిపుణులతో రీ - పోస్టుమార్టం చేయించాలని పిటిషనర్లు అడగలేదని.. అడ్వొకేట్ జనరల్ బీఎస్ ప్రసాద్ అభ్యంతరం వ్యక్తం చేశారు.
3. ఆధారాల సేకరణ కోసం తగిన ఉత్తర్వులు ఇవ్వొచ్చునని సుప్రీంకోర్టు తమకు స్వేచ్ఛనిచ్చిందని హైకోర్టు తెలిపింది.
4. సుప్రీంకోర్టు ఆదేశాలను అమలు చేయాల్సిన బాధ్యత తమపై ఉందని.. రీపోస్టుమార్టం కోసం ఆదేశించే విచక్షణాధికారం హైకోర్టుకు ఉందని పేర్కొంది.
5. ఒకవేళ మళ్లీ శవపరీక్ష అవసరమనుకుంటే.. తెలంగాణలో చాలా మంది ఫోరెన్సిక్ నిపుణులు ఉన్నారని అడ్వొకేట్ జనరల్ వాదించారు.

ప్రపంచం గమనిస్తోంది..!
ఎన్​కౌంటర్ పట్ల తెలంగాణ న్యాయ, పోలీసు వ్యవస్థ తీరును ప్రపంచమంతా గమనిస్తోందని హైకోర్టు వ్యాఖ్యానించింది. ఇది రాష్ట్ర ప్రభుత్వ ప్రతిష్టకు సంబంధించిన అంశమని పేర్కొంది. ఎన్​కౌంటర్ పై తాము అనుమానాలు వ్యక్తం చేయడం లేదని.. అయితే విచారణలో నిజాయితీ, పారదర్శకత ప్రదర్శించాలని అభిప్రాయపడింది.

సుప్రీం ఉత్తర్వులు అమలు చేస్తాం
పిటిషన్, సుప్రీంకోర్టు తీర్పు ప్రతులను కొద్దిసేపటికే తమకు సమర్పించినందున.. కౌంటరు దాఖలు చేసేందుకు సోమవారం వరకు గడువు ఇవ్వాలని అడ్వొకేట్ జనరల్ కోరారు. వాయిదా ఎందుకు వేయాలని.. సుప్రీంకోర్టు ఉత్తర్వులను తాము అమలు చేస్తామని.. తమ అధికారాలను ఎవరూ నియంత్రించలేరని హైకోర్టు వ్యాఖ్యానించింది.

మృతదేహాలను అప్పగించాలా..? వద్దా..?
మృతదేహాలకు అంతిమ సంస్కారాలు నిర్వహించే హక్కు కుటుంబసభ్యులకు ఉంటుందని పేర్కొంది. ప్రభుత్వాన్ని అడిగి వివరణ ఇచ్చేందుకు సమయం ఇవ్వాలని కోరారు. అంగీకరించిన ఉన్నత న్యాయస్థానం ప్రభుత్వం అభిప్రాయం అడిగి రేపు ఉదయం పదిన్నర గంటలకు తెలపాలని ధర్మాసనం ఆదేశించింది. అదేవిధంగా గాంధీ ఆస్పత్రి సూపరింటెండెట్ రేపు వ్యక్తిగతంగా హాజరై.. మృతదేహాలు ప్రస్తుతం ఏ స్థితిలో ఉన్నాయో నివేదిక సమర్పించాలని ఆదేశించింది.

"రీ-పోస్టు మార్టంపై​ ఇవాళ ఉదయం పదిన్నరకు ప్రభుత్వ అభిప్రాయం తెలపాలని ధర్మాసనం ఆదేశించింది. ప్రస్తుతం మృతదేహాలు ఏస్థితిలో ఉన్నాయో చెప్పాలని గాంధీ ఆస్పత్రి సూపరింటెండెంట్​ను హైకోర్టు ఆదేశించింది"