Covid Test Kits: లాలాజలం ద్వారా రక్తంలో కొవిడ్ యాంటీబాడీలను తెలుసుకొనేందుకు రెండు టెస్ట్ కిట్లను హైదరాబాద్లోని ఓ అంకుర సంస్థ ఆవిష్కరించింది. ఇంట్లోనే సొంతంగా యాంటీబాడీలను గుర్తించేలా ఓ విధానం.. డయాగ్నస్టిక్స్ కేంద్రంలో పరీక్ష కోసం మరో విధానాన్ని కనిపెట్టింది. హైదరాబాద్ కేంద్రీయ విశ్వవిద్యాలయం ఇంకుబేషన్ కేంద్రంలోని అంకుర సంస్థ రీజీన్ ఇన్నోవేషన్స్ ప్రైవేట్ లిమిటెడ్ వీటిని ఆవిష్కరించింది.
ఫాస్ట్ ఫ్లో స్పాట్ పరీక్షను ఇంట్లోనే సొంతంగా చేసుకోవచ్చునని.. ఫలితంగా శరీరంలోని యూంటీబాడీలను గుర్తించవచ్చని సదరు అంకుర సంస్థ రిజీన్ ఇన్నోవేషన్స్ తెలిపింది. పరీక్ష కిట్ను ఒకసారి మాత్రమే ఉపయోగించాల్సి ఉంటుందని స్పష్టం చేసింది. డయాగ్నస్టిక్స్ కేంద్రాల్లో కిట్ను అనేక సార్లు వినియోగించి లాలాజలం ద్వారా యాంటీ బాడీలను గుర్తించేందుకు ఎలీసా అనే విధానాన్ని రూపొందించినట్లు పేర్కొంది.
వ్యాక్సిన్ వేసుకున్న తర్వాత శరీరంలో యాంటీబాడీలు ఏ స్థాయిలో ఉన్నాయి.. బూస్టర్ డోస్ అవసరమా అనే విషయాలను నిర్ధారించుకోవడానికి ఈ రెండు పరీక్షలు ఉపయోగపడతాయని అంకుర సంస్థ ప్రతినిధులు డాక్టర్ ఉదయ్ సక్సేనా, సుబ్రహ్మణ్యం వంగల తెలిపారు. పరీక్షలకు పేటెంట్ పొంది, వాణిజ్య అవసరాలకు ఉత్పత్తి చేసేందుకు అమెరికాకు చెందిన కొవిడ్ ఉత్పత్తుల సంస్థ లే సైన్స్తో రీజీన్ ఇన్నోవేషన్స్ ఒప్పందం చేసుకుందని వెల్లడించారు.
ఇదీచూడండి: లాక్డౌన్ ఫేస్-2కు చైనా రెడీ.. కోటిన్నర మందికి ఒకేసారి కరోనా టెస్టులు
