కట్టడి ఉన్న ప్రాంతాల నుంచే కొత్త కేసులు

రాష్ట్రంలోని అత్యధిక జిల్లాల్లో కరోనా వైరస్‌ నియంత్రణలోనే ఉండగా.. జీహెచ్‌ఎంసీ, సూర్యాపేట, జోగులాంబ గద్వాల, వికారాబాద్‌ జిల్లాల్లో మాత్రం కేసుల ఉద్ధృతి కొనసాగుతోంది. మరోవైపు వనపర్తి, వరంగల్‌ గ్రామీణ, యాదాద్రి భువనగిరి జిల్లాల్లో ఇప్పటి వరకూ ఒక్క కేసు కూడా లేకుండా సురక్షితంగా ఉన్నాయి.

రాష్ట్రవ్యాప్తంగా ఈ నెల 21న 56 కేసులు నమోదవ్వగా.. ఆ తర్వాత 22న 15, 23న 27, 24న 13 పాజిటివ్‌ కేసుల చొప్పున నిర్ధారణ అయ్యాయి. ఫలితంగా ప్రభుత్వ కార్యాచరణ గట్టిగా అమలవుతున్నట్లు స్పష్టమవుతోంది. ఎక్కువ జనసాంద్రత కలిగిన నగరాల్లో అత్యధిక కేసులు నమోదవుతున్న ప్రాంతంగా హైదరాబాద్‌ను ఎంపిక చేసి, ఇక్కడికి ప్రత్యేక బృందాన్ని పంపించాలని కేంద్ర ప్రభుత్వం నిర్ణయించింది. రాష్ట్రంలో ఆ ప్రాతిపదికన సూర్యాపేట, జోగులాంబ గద్వాల, వికారాబాద్‌ జిల్లాలూ ఉన్నాయి. రాష్ట్ర ప్రభుత్వం చేపట్టిన కార్యాచరణపై కేంద్ర బృందం పర్యటనలో సమీక్షించనున్నట్లు వైద్యవర్గాలు తెలిపాయి.

ఆ నాలుగు ప్రాంతాల్లో...

నాలుగు జిల్లాలు.. తొమ్మిది రోజులు.. 189 కేసులు.. జీహెచ్‌ఎంసీ, సూర్యాపేట, గద్వాల, వికారాబాద్‌ జిల్లాల్లో కరోనా కేసుల వ్యాప్తి తీరిది. గత తొమ్మిది రోజుల్లో ఈ నాలుగు ప్రాంతాల్లో కేసులు గణనీయంగా పెరిగాయి. వికారాబాద్‌ జిల్లాలో ఈ నెల 9 నుంచి 23 వరకూ (15 రోజుల్లో) కేసులు 5 నుంచి ఏకంగా 38 (ఏడింతలు)కి పెరిగాయి. ఈ ప్రాంతాల్లో ప్రభుత్వం ఇప్పటికే మరింత కట్టుదిట్టమైన చర్యలకు ఉపక్రమించింది.

• గ్రేటర్‌ హైదరాబాద్‌ పరిధిలో కొత్త కేసులు లేని 45 ప్రాంతాలను ప్రభుత్వం శుక్రవారం కంటెయిన్‌మెంట్‌ జోన్ల జాబితా నుంచి తొలగించింది.
• కేవలం రెండు పాజిటివ్‌ కేసులు నమోదైన పెద్దపల్లి జిల్లాకు ఊరట కలిగింది. వైరస్‌ సోకిన ఇద్దరు బాధితులు కోలుకుని డిశ్ఛార్జి కావడం, కొత్త కేసులు లేకపోవడంతో కలెక్టర్‌ సిక్తా పట్నాయక్‌ రామగుండంలో రెడ్‌జోన్‌ను ఎత్తివేస్తున్నట్లు శుక్రవారం ప్రకటించారు.

నిజామాబాద్‌, కామారెడ్డి, కరీంనగర్‌, వరంగల్‌ అర్బన్‌ జిల్లాల్లో తొలుత ఒక్కసారిగా పెద్దసంఖ్యలో పాజిటివ్‌ కేసులు బయటపడినా, క్రమేణా తగ్గుముఖం పట్టాయి. భద్రాద్రి కొత్తగూడెం జిల్లాను కేంద్ర ప్రభుత్వం ఇప్పటికే కరోనా రహిత జిల్లాగా ప్రకటించింది. సిద్దిపేట, పెద్దపల్లి జిల్లాలు కూడా అదే బాటలో నడుస్తున్నాయి.

నల్గొండలో రేపటి నుంచి సర్వే

కరోనా వ్యాప్తి పరిశీలన కోసం కేంద్ర ప్రభుత్వం దేశవ్యాప్తంగా 82 జిల్లాలను ఎంపిక చేయగా అందులో తెలంగాణలోని నల్గొండ, జనగామ, కామారెడ్డి జిల్లాలు ఉన్నాయి. ఈ మేరకు ఇండియన్‌ కౌన్సిల్‌ ఆఫ్‌ మెడికల్‌ రీసెర్చ్‌ (ఐసీఎంఆర్‌) సర్వే చేయనుంది. ఈ సంస్థ ప్రతినిధులు డా.ఉదయ్‌కుమార్‌, డా.జగ్జీవన్‌బాబు శుక్రవారం నల్గొండలో కలెక్టర్‌ ప్రశాంత్‌ జీవన్‌ పాటిల్‌ను కలిసి ఈ నెల 26 నుంచి జిల్లాలో నిర్వహించనున్న సర్వేపై చర్చించారు. జిల్లాలోని పట్టణ, సెమీ అర్బన్‌, గ్రామీణ ప్రాంతాల్లో పది ఆవాసాలను ఎంపిక చేసుకుని 400 మంది నుంచి నమూనాలను సేకరించి ర్యాపిడ్‌ కిట్ల ద్వారా పరీక్ష చేయనున్నారు.

ఇవీ చూడండి: హీరోపై అభిమానం హద్దు మీరి హంతకుడ్ని చేసింది!