కొలిక్కి రాని పండ్ల మార్కెట్ తరలింపు వ్యవహారం

గడ్డిఅన్నారం పండ్ల మార్కెట్‌ తరలింపు వ్యవహారం ఇంకా ఓ కొలిక్కి రావడం లేదు. తాత్కాలికంగా కొహెడలో నిర్వహించుకోవాలన్న మార్కెటింగ్‌ శాఖ సూచనలను కమీషన్‌ ఏజెంట్లు లెక్కచేయడం లేదు. అక్కడ పూర్తిస్థాయి సౌకర్యాలు లేవంటూ ఎదురు తిరుగుతున్నారు. వాళ్లను బుజ్జగించేందుకు అధికారులు చేసిన ప్రయత్నాలు ఫలించడం లేదు.

హైదరాబాద్ గడ్డిఅన్నారం పండ్ల మార్కెట్‌కు ఈ నెల 13 నుంచి పాలకవర్గం సెలవు ప్రకటించింది. అత్యంత రద్దీగా ఉండే మార్కెట్‌లో కోయంబేడు తరహా పరిస్థితులు తలెత్తకూడదని మార్కెటింగ్ శాఖ చర్యలు చేపట్టింది.

కరోనా నియంత్రణలో భాగంగా పారిశుద్ధ్య పనులు నిర్వహిస్తోంది. రెండు వారాలపాటు నగర శివారు కొహెడలో తాత్కాలికంగా కార్యకలాపాలు నిర్వహించాలని నిర్ణయించింది.

వర్తకులు, కమీషన్‌ ఏజెంట్లు తరలివెళ్లాలని అధికారులు సూచించారు. గత అనుభవాల దృష్ట్యా కొహెడకు వెళ్లబోమని కమీషన్‌ ఏజెంట్లు, పండ్ల వ్యాపారులు తేల్చిచెప్పారు. ఏ మాత్రం వసతులు లేవని అసంతృప్తి వ్యక్తం చేస్తున్నారు.