పదో తరగతి పరీక్షల నిర్వహణపై నేడు కీలక సమావేశం జరగనుంది. ముఖ్యమంత్రి చంద్రశేఖర్ రావు మధ్యాహ్నం రెండు గంటలకు ప్రగతి భవన్లో ఉన్నత స్థాయి సమావేశం నిర్వహించనున్నారు. హైకోర్టు తీర్పు నేపథ్యంలో... నేటి నుంచి తలపెట్టిన పరీక్షలు ప్రభుత్వం వాయిదా వేసింది. కొంతకాలం వేచి చూసి కరోనా ప్రభావం తగ్గిన తర్వాత పరీక్షలు నిర్వహించాలా? లేక పరీక్షలు రద్దు చేయాలా? అనే అంశంపై నేడు చర్చించనున్నారు. విద్యార్థుల్లో ఉత్కంఠ నెలకొన్నందున... పరీక్షలపై స్పష్టత ఇస్తూ ఇవాళ కీలక నిర్ణయం ప్రకటించే అవకాశం ఉంది.
రద్దుకే మొగ్గు..!
జులైలో పరీక్షలు నిర్వహించాలనుకున్నా... అప్పుడు కూడా హైకోర్టు అనుమతి ఇస్తుందా లేదా అనే అనుమానాలు విద్యాశాఖలో ఉన్నాయి. దాని వల్ల ఇంటర్, పాలిటెక్నిక్ విద్యా సంవత్సరాలు కూడా ఆలస్యం అయ్యే అవకాశం ఉంది. కాబట్టి పదో తరగతి పరీక్షలు రద్దు చేసి అందరినీ పాస్ చేసేందుకు ప్రభుత్వం మొగ్గు చూపుతున్నట్టు తెలుస్తోంది. ఇంటర్నల్ పరీక్షల మార్కుల ఆధారంగా... గ్రేడ్లు ఖరారు చేసే అవకాశం కనిపిస్తోంది. పంజాబ్, మహారాష్ట్రలో పరీక్షలు లేకుండా ఎలా ప్రమోట్ చేశారో విద్యాశాఖ అధికారులు పరిశీలించి... సీఎంకు నివేదిక ఇచ్చినట్టు సమాచారం. ముఖ్యమంత్రి కేసీఆర్ నిర్ణయం కోసం సుమారు ఐదున్నర లక్షల మంది విద్యార్థులు ఉత్కంఠతో ఎదురు చూస్తున్నారు.
లాక్డౌన్పై సమీక్ష
రాష్ట్రంలో రోజురోజుకూ కరోనా పాజిటివ్ కేసులు పెరుగుతున్నాయి. జిల్లాల్లోనూ పాజిటివ్ కేసుల సంఖ్య ప్రతి రోజూ నమోదు అవుతుండగా.. హైదరాబాదులో ప్రతిరోజూ వందకు పైగా కేసులు నమోదు కావడం ఆందోళనకరంగా మారింది. లాక్ డౌన్ ఆంక్షలు సడలించినప్పటి నుంచి కేసులు, వైరస్తో మరణాలు గణనీయంగా పెరుగుతున్నాయి. మహమ్మారిపై పోరాడుతున్న వైద్యులు, సిబ్బంది, పోలీసుల్లోనూ వెలుగు చూస్తున్నాయి. ఈ పరిస్థితుల్లో ప్రగతి భవన్లో ఇవాళ సాయంత్రం నాలుగున్నరకు వైద్య, ఆరోగ్యశాఖ మంత్రి ఈటల రాజేందర్, ఉన్నతాధికారులతో సమావేశం నిర్వహించనున్నారు. కరోనా వైరస్ పరిస్థితి, లాక్డౌన్ అమలు తీరును ముఖ్యమంత్రి పూర్తిస్థాయిలో సమీక్షించి, కీలక నిర్ణయాలు తీసుకోనున్నారు.
ఇదీ చూడండి: రాష్ట్రంలో మరో 154 కరోనా పాజిటివ్ కేసులు.. 14 మంది మృతి
