శీతాకాల సమావేశాల తొలిరోజు ఏపీ శాసనసభలో వేడి పుట్టింది. అధికార ప్రతిపక్షాల మధ్య ఆరోపణలు, ప్రత్యారోపణలతో సెగలు రేగాయి. ప్రతిపక్షనేత చంద్రబాబు పోడియం ముందు బైఠాయించగా.. ప్రభుత్వం ఆయనతో సహా.. టీడీపీ శాసనసభ్యులను సస్పెండ్ చేసింది. సభలో వైకాపా వ్యవహరించిన తీరుపై చంద్రబాబు నిప్పులు చెరిగారు. శాసనసభ ద్వారా ప్రజలకు అబద్దాలు చెబుతూ... వాటిని అడ్డుకుంటున్న తమను సభ నుంచి బయటకు పంపారని ధ్వజమెత్తారు. వైకాపా ప్రభుత్వం చెప్పేవన్నీ తప్పుడు లెక్కలేనని... 'ఇదొక ఫ్రాడ్ ప్రభుత్వం.. ఆయన ఫేక్ సీఎం' అంటూ తీవ్రంగా విరుచుకుపడ్డారు. ముఖ్యమంత్రి కోసం.. సభా నియమాలకు విరుద్ధంగా శాసనసభను ఆలస్యంగా మొదలుపెట్టడం దారుణమన్నారు. పంచాయతీరాజ్ బిల్లుపై చర్చించకుండా ఏకపక్షంగా ఆమోదించారని ఆరోపించారు. పంటనష్టంపై ప్రభుత్వం గాలి కబుర్లు చెబుతోందన్న ఆయన... ఏడాదిలోనే లక్షా 25 వేల కోట్లు అప్పు చేశారని ఆక్షేపించారు. రామానాయుడును ఎద్దేవా చేస్తూ సీఎం మాట్లాడటం సరికాదని అభిప్రాయపడ్డారు.
నా రాజకీయ చరిత్రలో నేనెప్పుడూ పోడియంలోకి వెళ్లలేదు. పరిటాల రవి హత్య సందర్భంలో కూడా నేను పోడియంలోకి వెళ్లలేదు. రైతుల విషయంలో సీఎం తీరు నచ్చకే బైఠాయించా.
- చంద్రబాబు, తెదేపా అధినేత
తాను 14 ఏళ్లుగా ముఖ్యమంత్రిగా పనిచేశానని.. తప్పుడు ప్రకటనలు ఇస్తున్న సీఎంను తొలిసారి చూస్తున్నానని చంద్రబాబు అన్నారు. సభలో వైకాపా నేతలు నీచంగా మాట్లాడారని ఆగ్రహం వ్యక్తం చేశారు. బిల్లులపై చర్చిద్దామని ఎంత చెప్పినా వినిపించుకోలేదన్నారు.
వరదల వల్ల పంటలు పూర్తిగా పాడయ్యాయి. కౌలురైతులు కూడా బాగా నష్టపోయారు. ఏడాదిలోనే రూ.లక్షా 20 వేల కోట్లు అప్పు చేశారు. గాలిమాటలు చెప్పడం.. గాలిలో తిరగడం.. ఇది కాదు బాధ్యత అంటే. పంటలు నష్టపోయిన రైతులను ఆదుకునే బాధ్యత లేదా..? పంటల బీమా ప్రీమియంపై అడిగితే ఎదురుదాడి చేస్తున్నారు. పంటల బీమా రూ.1300 కట్టుంటే రైతులకు సాయం అందేది.
- చంద్రబాబు, తెదేపా అధినేత
రైతుల సమస్యలపై మాట్లాడితే సస్పెండ్ చేస్తారా?
విశాఖలో భూముల కొనుగోలు ఇన్‌సైడర్ ట్రేడింగ్ కాదా? అని చంద్రబాబు.. ఏపీ ప్రభుత్వాన్ని నిలదీశారు. ప్రజల కోసం తొలిసారి అనేక అవమానాలు ఎదుర్కొంటున్నానని అన్నారు. ప్రతిపక్ష నేతను వైఎస్‌ఆర్ కూడా గౌరవించేవారని గుర్తు చేశారు. పద్ధతి లేకుండా ప్రవర్తించడం ప్రజాస్వామ్యంలో మంచిది కాదని అభిప్రాయపడ్డారు. కక్షలు, విధ్వంసాలు.. రాజకీయాల్లో పనికిరావని హితవు పలికారు. సస్పెండ్ చేసింది తమను కాదని.. రైతులను అని వ్యాఖ్యానించారు. రైతుల సమస్యలపై మాట్లాడుతుంటే సస్పెండ్ చేస్తారా? ప్రశ్నించారు.
- ఇదీ చదవండి : ఓటేయాలంటే.. వీటిలో ఏదో ఒకటి తప్పనిసరి
