తెలంగాణ సంస్కృతి సంప్రదాయాలకు ప్రతీకగా నిలిచే బతుకమ్మ పండుగ వేడుకలు (Bathukamma festival in telangana) ఘనంగా జరుపుకునేందుకు... వనితలు సన్నద్ధమైతున్నారు. తొలి రోజున జరిగే ఎంగిలిపూల బతుకమ్మలకోసం... ఉదయం నుంచి పూల సేకరణలో నిమగ్నమైయ్యారు. తీరొక్క పూలను తీసుకొచ్చి...పేర్చి...అందమైన బతుకమ్మలను తయారు చేస్తున్నారు. ఆటలు ఆడుతున్నారు... పాటలు పాడుతున్నారు.
హనుమకొండ వేయిస్తంభాల గుడి ఆవరణలోనూ పద్మాక్షి గుండం... ఇతర ఆలయాల వద్ద ఘనంగా పండుగ జరుపుకునేందుకు సిద్ధమైతున్నారు. కరోనా మహమ్మారి కారణంగా...గత రెండేళ్లుగా పండుగ సరిగ్గా జరుపుకోలేదని.... దీంతో ఈసారి పండుగ ఎప్పుడెప్పుడు జరుపుకుంటామా అని ఎదురుచూస్తున్నట్లు మహిళలు తెలిపారు. హనుమకొండ నగరంలోని సిటీ డిగ్రీ కళాశాల విద్యార్థులు బతుకమ్మ ఆటలు ఆడుతూ సందడి చేశారు. బతుకమ్మ చుట్టూ తిరుగుతూ పాటలు, నృత్యాలు చేస్తూ హోరెత్తించారు. వందలాదిమంది విద్యార్థులు ఒక చోట చేరి బతుకమ్మ సంబురాలు ఘనంగా జరుపుకున్నారు.
ఆదిలాబాద్‌లోని డిగ్రీ, బీఎడ్ కళాశాలలో సంబురంగా బతుకమ్మ పండుగ నిర్వహించారు. బతుకమ్మలను చేతబట్టుకుని తంగేడు చెట్టు వద్ద ప్రత్యేక పూజలు చేశారు. అనంతరం విద్యార్థినులు, అధ్యాపకులు ఆడిపాడారు.
బహుజన బతుకమ్మను ప్రజా గాయకురాలు విమలక్క గన్ పార్క్ అమరవీరుల స్థూపం వద్ద ఘనంగా నిర్వహించారు. ప్రకృతి వ్యవసాయంతో బతుకమ్మను రాష్ట్ర వ్యాప్తంగా 9 రోజులు నిర్వహిస్తామన్నారు. రైతులను, వ్యవసాయాన్ని కాపాడుకొనేందుకు మహిళలు ముందడుగు వేయాలని విమలక్క పిలుపునిచ్చారు.
ఇదీచూడండి: Telugu Academy Case: అకాడమీ ఫిక్స్‌డ్‌ డిపాజిట్ల కుంభకోణంలో పురోగతి
