హైదరాబాద్లో రోజురోజుకూ ట్రాఫిక్ భారీగా పెరిగిపోతోంది. రోడ్లపై రద్దీతో వాహనాదారులు పడే ఇబ్బందులు అన్నీ ఇన్నీ కావు. ఈ పరిస్థితుల్లో ట్రాఫిక్ చిక్కులు తీర్చేందుకు ప్రభుత్వం వ్యూహాత్మక రహదారుల అభివృద్ధి ప్రాజెక్టును ప్రారంభించింది. ట్రాఫిక్ ఎక్కువగా ఉన్న ప్రాంతాల్లో ఫ్లైఓవర్లు, అండర్ పాసులను నిర్మిస్తోంది. ఇప్పటికే పలు పైవంతెనలు, అండర్ పాస్లు అందుబాటులోకి రాగా.... ఇప్పుడు బైరామల్గూడ చౌరస్తాలో ఫ్లైఓవర్ను మంత్రి కేటీఆర్ ప్రారంభించనున్నారు. ఎస్సార్డీపీ ప్యాకేజీ-2లో భాగంగా రూ. 26.45 కోట్ల అంచనా వ్యయంతో కుడివైపు ఫ్లైఓవర్ నిర్మించారు.
ప్రత్యేక సాంకేతికతతో నిర్మాణం...
బైరామల్ గూడ జంక్షన్లో నిర్మించిన కుడివైపు ఫ్లైఓవర్ నిర్మాణంలో ప్రత్యేక సాంకేతికతను వినియోగించారు. ఈ పైవంతెనతో బైరామల్ గూడ జంక్షన్, సాగర్రోడ్ జంక్షన్పై ఒత్తిడి తగ్గనుంది. బైరామల్గూడ జంక్షన్లో రద్దీ వేళల్లో గంటకు దాదాపు 12 వేల వాహనాలు ప్రయాణిస్తాయి. సికింద్రాబాద్ నుంచి ఓవైసీ జంక్షన్కు, శ్రీశైలం వెళ్లే వాహనదారులకు కూడా ఈ ఫ్లైఓవర్ ఉపయోగకరంగా మారనుంది.
14 పనుల్లో ఆరు పూర్తి...
ప్రభుత్వం ఎస్సార్డీపీ కింద చేపట్టిన 14 పనులలో ఆరు పనులు పూర్తయ్యాయి. ప్యాకేజీ-2లో భాగంగా రూ.448 కోట్ల అంచనా వ్యయంతో ఎల్బీనగర్ చౌరస్తా, బైరమాల్గూడ, నాగోల్ కామినేని చౌరస్తా, చింతల్కుంట వద్ద పైవంతెనలు, అండర్పాసుల నిర్మాణానికి శ్రీకారం చుట్టారు. వీటిలో ఇప్పటివరకు ఎల్బీనగర్ జంక్షన్లో దిల్సుఖ్ నగర్ నుంచి హయత్నగర్ వైపు వెళ్లేందుకు ఫ్లై ఓవర్ అందుబాటులోకి వచ్చింది. కామినేని జంక్షన్లో కుడి, ఎడమ ఫ్లైఓవర్లు ప్రారంభమయ్యాయి. ఎల్బీనగర్, చింతల్కుంట అండర్పాసులపైన వాహనాలు రాకపోకలు సాగిస్తున్నాయి. ఇప్పుడు బైరామల్గూడ చౌరస్తాలో పైవంతెన ప్రారంభానికి సిద్ధమైంది. ఇదే జంక్షన్లో మిగిలిన పనులు కూడా కొనసాగుతున్నాయి.
