ఆటకు బానిసై నిద్రాహారాలు మానేశాడు.. చివరికి చనిపోయాడు

ఆడుతూ, పాడుతూ హాయిగా గడపాల్సిన యువకులు సెల్​ఫోన్​ ప్రపంచంలో పడి ప్రాణాలనే వదులుతున్నారు. ఇలాంటి ఘటనే పశ్చిమగోదావరి జిల్లా ద్వారకా తిరుమల మండలం జాజులకుంట గ్రామంలో జరిగింది. 16 ఏళ్ల యువకుడు తల్లిదండ్రులకు కడుపుకోత మిగిల్చాడు.సెల్​ఫోన్​లో పబ్జీగేమ్ ఆడుతూ నిద్రహారాలు మానేశాడు. చివరికి అస్వస్థతకు గురై ప్రాణాలు విడిచాడు.

పశ్చిమ గోదావరి జిల్లా ద్వారకాతిరుమల మండలం జాజులకుంట గ్రామంలో దారుణం చోటుచేసుకుంది. పబ్జీ ఆటకు బానిసై ఓ బాలుడు మృతి చెందాడు. జాజులకుంట గ్రామానికి చెందిన పైడిమాల పవన్ కుమార్ (16) పబ్జీ, ఫ్రీ ఫైర్ ఆటలకు బానిసయ్యాడు. ప్రతిరోజు ఈ ఆటలాడుతూ సెల్ ఫోన్​కు హత్తుకు పోయేవాడు.

గత వారం రోజులుగా ఏకధాటిగా నిద్రాహారాలు లేకుండా ఆటలాడాడు. ఈ క్రమంలో అతనికి వాంతులు-విరేచనాలు కావడంతో అస్వస్థతకు గురై మృతి చెందాడు. అనుమానంతో అతనికి కరోనా పరీక్షలు చేయించగా నెగిటివ్ వచ్చిందని కుటుంబ సభ్యులు తెలిపారు.