ఆదిలాబాద్‌లో ఫ్లెక్సీల తొలగింపుపై భాజపా శ్రేణులు ఆందోళనకు దిగాయి. అయోధ్యలో జరగాల్సిన రామాలయ భూమి పూజకు సంబంధించి భాజపా ఆధ్వర్యంలో పట్టణంలోని ప్రధాన కూడళ్లలో ఫ్లెక్సీలు ఏర్పాటు చేయగా... మున్సిపల్ సిబ్బంది వాటిని తొలగించారు.
ఈ విషయం తెలుసుకున్న భాజపా జిల్లా అధ్యక్షుడు పాయల్‌ శంకర్‌ పార్టీ శ్రేణులతో కలిసి మున్సిపల్ కార్యాలయం ఎదుట నిరసన తెలిపారు. కార్యాలయంలోకి చొచ్చుకెళ్లి అధికారులను నిలదీసే యత్నాన్ని పోలీసులు అడ్డుకోగా స్వల్ప వాగ్వాదం జరిగింది. ఆ తర్వాత అధికారులు ఫ్లెక్సీల ఏర్పాటుకు ఒప్పుకోవటం వల్ల వివాదం సద్దుమణిగింది.
