హోమ్ ​లోన్ EMI సరిగా కట్టకపోతే ఏమవుతుంది? బ్యాంకులు ఏం చేస్తాయి?

What Happens If You Cannot Repay Home Loan: ఇల్లు కట్టుకోవడానికి తగినంత డబ్బు లేనివారు.. హౌసింగ్ లోన్ వైపు చూస్తారు. బ్యాంక్ నుంచి లోన్ తీసుకుని ఇల్లు నిర్మిస్తారు. తర్వాత ప్రతి నెలా ఈఎంఐ చెల్లిస్తూ వెళ్తారు. ఒకవేళ EMI సరిగా చెల్లించలేకపోతే ఏమౌతుంది? బ్యాంకులు ఏం చేస్తాయి? అనే విషయాలు ఇప్పుడు తెలుసుకుందాం.

What Happens If You Cannot Repay Home Loan: సొంత ఇల్లు చాలా మందికి స్వప్నం. కానీ.. తగినంత ఆర్థిక స్థోమతలేని వారు బ్యాంకు రుణాలపై ఆధారపడతారు. ప్రస్తుతం మార్కెట్లో హౌసింగ్ లోన్ అనేది చాలా సులువుగానే అందుబాటులో ఉంది. 15 నుంచి 30 ఏళ్ల కాలవ్యవధికి వాయిదాల పద్ధతిలో చెల్లించేందుకు బ్యాంకులు వెసులుబాటు కల్పిస్తున్నాయి.

అయితే.. వాయిదాల పద్ధితిలో చెల్లింపులు అనేది వినటానికి సులువుగానే ఉన్నా, సంవత్సరాల తరబడి చెల్లించే క్రమంలో ఇబ్బందులు కూడా ఉంటాయి. ఎందుకంటే.. పరిస్థితులు ఎప్పుడు ఎలా ఉంటాయో తెలియదు. అలాంటి సందర్భాల్లో కొంత మంది సకాలంలో లోన్ చెల్లింపులు చేయలేరు. మరి, అప్పుడు ఏమవుతుంది? బ్యాంకులు ఎలాంటి చర్యలు తీసుకుంటాయి? అనే వివరాలు ఇప్పుడు తెలుసుకుందాం.

ఒక నెల కట్టకపోతే? : హోమ్ లోన్ తీసుకున్న వారు ఒక నెల EMI కట్టలేకపోతే.. అప్పుడు బ్యాంకులు లేదా ఆర్థిక సంస్థలు వారికి SMS, ఈ-మెయిల్, మొబైల్ కాల్స్ ద్వారా రిమైండర్స్​ పంపుతాయి. ఇది మాత్రమే కాకుండా కొన్ని అదనపు ఛార్జీలను కూడా వేస్తాయి. చెక్ బౌన్స్ ఛార్జీలు సైతం విధించే అవకాశం ఉంది. లోన్ ఈఎంఐ కట్టకపోతే బ్యాంకులు ఔట్‌స్టాండింగ్ లోన్ అమౌంట్‌పై 1 నుంచి 2 శాతం పెనాల్టీ విధిస్తాయి. దీన్ని EMI వాయిదాతోపాటు చెల్లించాల్సి ఉంటుంది.

రెండో నెల చెల్లించకపోతే? : వరుసగా రెండో నెల కూడా ఈఎంఐ కట్టలేని పరిస్థితి వస్తే.. అప్పుడు బ్యాంక్ నుంచి వార్నింగ్ వస్తుంది. లోన్ ఈఎంఐ అమౌంట్‌, పెనాల్టీ చార్జీలను వెంటనే చెల్లించాలంటూ బ్యాంకులు రుణ గ్రహీతలకు నోటీసులు పంపుతారు. ఒక నెల ఈఎంఐ కట్టకపోతే బ్యాంకులు సాధారణంగానే చూస్తాయి. రెండో నెల ఈఎంఐ కట్టకపోతే బ్యాంకులు అలర్ట్ అవుతాయి. రెండు ఈఎంఐ డబ్బులను వెంటనే చెల్లించాలని కోరతాయి.

మూడో నెల కట్టకపోతే? : ఇక మూడో నెల కూడా EMI కట్టకపోతే మాత్రం.. అప్పుడు బ్యాంకలు మీ లోన్ అకౌంట్‌ను మైనర్ డిఫాల్ట్ కింద పరిగణిస్తాయి. అంటే మొండి బకాయిగా చూస్తాయి. మీ లోన్‌ను ఎన్‌పీఏ(NPA)గా మార్చడానికి ముందు బ్యాంక్ మీకు నోటీసులు పంపుతుంది. మీకు రిమైండర్లు వస్తూనే ఉంటాయి.

SARFAESI చట్టం ప్రకారం.. : రుణం తీసుకుని ఈఎంఐ చెల్లించని వారిపై SARFAESI Act- 2002 ప్రకారం బ్యాంక్ చర్యలు ప్రారంభిస్తుంది. తమ డబ్బును 60 రోజుల్లోగా చెల్లించాలని బ్యాంకులు లీగల్ నోటీసును పంపుతాయి. ఈ గడువులోపు హోమ్ లోన్ చెల్లించని పక్షంలో ఒక్క నోటీసు ఇవ్వటం ద్వారా.. కోర్టుకు వెళ్లకుండానే ఆస్తిని జప్తు చేయడానికి బ్యాంకుకు SARFAESI చట్టం అనుమతిస్తుంది. అందువల్ల.. EMI చెల్లింపులు సమయానికి చేయాలని నిపుణులు సూచిస్తున్నారు.

EMIలు చెల్లించకుండా డిఫాల్టర్​గా మారితే.. మీ క్రెడిట్ స్కోర్ తీవ్రంగా దెబ్బతింటుంది. అందువల్ల చెల్లింపులు సకాలంలో చేయాలి. ఒకవేళ లోన్ ఈఎంఐ అనుకున్న సమయానికి కట్టలేకపోతే.. బ్యాంక్ అధికారులను కలిసి మాట్లాడాలి. మారటోరియం, గ్రేస్ పీరియడ్ వంటి ఆప్షన్లను ఉపయోగించుకోవాలి. అంతే తప్ప.. ఎగవేతదారుగా మారకూడదని ఆర్థిక నిపుణులు హెచ్చరిస్తున్నారు.