Upcoming electric cars in India: విద్యుత్తు వాహనాలకు డిమాండ్ పెరగటం వల్ల ఈ-వెహికిల్స్పై దృష్టిసారిస్తున్నాయి ప్రముఖ ఆటోమొబైల్ సంస్థలు. భారత మార్కెట్లోకి కొత్త కొత్త మోడల్స్ను తీసుకొస్తున్నాయి. ఇందులో భాగంగానే దక్షిణ కొరియా ఆటోమేకర్ కియా.. భారత్లో ఎలక్ట్రిక్ వాహనాలను ప్రవేశపెట్టేందుకు సిద్ధమైంది. ఈ ఏడాది చివరికల్లా హైఎండ్ ప్రీమియం ఎలక్ట్రిక్ క్రాస్ఓవర్ ఈవీ6ను తీసుకొస్తున్నట్లు ప్రకటించింది. భారత మార్కెట్లో ఇప్పటికే సెల్టోస్, సొనెట్ మోడల్స్ను విక్రయిస్తున్న కియా.. ఎలక్ట్రిక్ మోడల్ ఈవీ6 బుకింగ్స్ను మే 26న ప్రారంభిస్తున్నట్లు ప్రకటించింది. అయితే.. 100 యూనిట్లు మాత్రమే భారత్లో విక్రయించనున్నట్లు తెలిపింది.
"భారత్లో మా బ్రాండ్ను మరోస్థాయికి చేర్చేందుకు కియా సిద్ధమైంది. అంతర్జాతీయంగా అత్యంత ఆదరణ లభిస్తున్న విద్యుత్తు వాహన శ్రేణిని ప్రారంభిస్తున్నాం. ఈవీ6 నిజమైన గేమ్ ఛేంజర్. అల్ట్రాఫాస్ట్ ఛార్జింగ్ సామర్థ్యం, విశాలమైన హైటెక్ ఇంటీరియర్ ద్వారా సౌకర్యవంతంగా ఉండేలా మా వాహనాన్ని తీర్చిదిద్దుతున్నాం. విద్యుత్తు వాహనం కొనుగోలు చేయాలనుకుంటున్న వినియోగదారులను మాత్రమే కాదు.. ప్రీమియం కారు కోసం వేచిచూస్తున్న కస్టమర్లను చేరుకునేందుకు ప్రయత్నిస్తున్నాం. "
- తేజిన్ పార్క్, కియా ఇండియా ఎండీ.
హోండా నుంచి ఈ-బైక్స్: ప్రముఖ ద్విచక్ర వాహనాల తయారీ సంస్థ హోండా మోటర్ సైకిల్, స్కూటర్ ఇండియా(హెచ్ఎంఎస్ఐ) దేశీయ మార్కెట్లోకి అనేక మోడళ్లలో ఎలక్ట్రిక్ బైక్స్ తీసుకొచ్చేందుకు ప్రణాళికలు రచిస్తున్నట్లు ప్రకటించింది. మరోవైపు.. ఎంట్రీ లెవల్లో 100 సీసీ బైక్ తీసుకురానుండగా.. ఎగుమతులను పెంచుకునేందుకు వివిధ మోడల్స్ను ప్రవేశపెట్టనున్నట్లు పేర్కొంది. ఇందుకు హరియాణాలోని మనేసర్ ప్లాంట్ను గ్లోబల్ హబ్గా అభివృద్ధి చేస్తున్నామని తెలిపింది. వీటితో పాటుగా ప్రస్తుతం ఉన్న మోడల్స్లో ఫ్లెక్స్ ఫ్యూయల్ సాంకేతికతను తీసుకురానున్నట్లు పేర్కొంది.
మారుతి ఎక్స్ఎల్6 కొత్త వెర్షన్: దేశీయ అతిపెద్ద కార్ల తయారీ సంస్థ మారుతీ సుజుకీ గురువారం మల్టీపర్పస్ వెహికిల్ ఎక్స్ఎల్6లో కొత్త వెర్షన్ను విడుదల చేసింది. ఈ కొత్త ఎక్స్ఎల్6 వెర్షన్లో 75.8కిలోవాట్ల పవర్తో 1.5 లీటర్ల పెట్రోల్ ఇంజిన్ ఉంది. అలాగే.. అది మాన్యువల్, ఆటోమేటిక్ ట్రాన్స్మిషన్ మోడ్లోనూ పని చేయనుంది. దీని ధర రూ.11.29 లక్షల నుంచి రూ.14.55 లక్షలు(ఎక్స్షోరూం ధర) మధ్య ఉండనుందని సంస్థ తెలిపింది. ప్రస్తుత సవాళ్ల సమయంలో సంస్థ పగ్గాలు చేపట్టటం చాలా సంతోషంగా ఉందని, ఈ సవాళ్లను అధిగమించి ముందుకు సాగుతామని పేర్కొన్నారు ఇటీవలే మారుతీ సుజుకీ ఇండియా ఎండీ, సీఈఓగా నియామకమైన హిసా టేకుచి.
మారుతీ సుజుకీ ఎక్స్ఎల్6 4 లక్షల మార్క్ దాటిన టాటా టియాగో: దేశీయ దిగ్గజ ఆటోమేకర్ టాటా మోటర్స్ నుంచి విడుదలైన టాటా టియాగో మరో మైలురాయిని చేరుకుంది. 4 లక్షల విక్రయాల మార్క్ను చేరుకున్నట్లు సంస్థ ప్రకటించింది. ఎంట్రీ లెవల్ మోడల్ను 2016లో మార్కెట్లోకి తీసుకొచ్చింది టాటా మోటర్స్. అతి తక్కువ సమయంలో ఈ చారిత్రక మైలురాయిని చేరుకున్న తొలికారుగా టియాగో నిలిచినట్లు టాటా మోటార్స్ ప్రయాణికుల వాహనాల ఉపాధ్యక్షుడు రజన్ అంబా తెలిపారు. అత్యంత సురక్షితమైన, ఆకర్షణీయమైన కారు కోసం చూసే యువత ఎక్కువగా టియాగోకే ప్రాధాన్యం ఇచ్చారని, 60 శాతానికిపైగా విక్రయాలు తొలిసారి కారు కొనుగోలు చేసినవారే ఉన్నట్లు పేర్కొన్నారు.
4 లక్షల మార్క్ను చేరుకున్న టాటా టియాగో బ్యాటరీ మార్పిడిపై నీతి ఆయోగ్ ముసాయిదా: దేశంలో విద్యుత్తు వాహనాలకు ఆదరణ పెరుగుతున్న నేపథ్యంలో బ్యాటరీ మార్పిడి పాలసీ ముసాయిదాను విడుదల చేసింది నీతి ఆయోగ్. మార్పిడి చేసే బ్యాటరీలకు ప్రోత్సాహకాలు ఇవ్వటం సహా కఠినమైన పరీక్షలను సూచించింది. విద్యుత్తు వాహనాల్లో మంటలు చెలరేగి వాటి భద్రతపై ఆందోళన నెలకొన్న తరుణంలో ఈ ముసాయిదాను తీసుకురావటం ప్రాధాన్యం సంతరించుకుంది. అభివృద్ధి చెందుతున్న నగరాల్లో ద్విచక్ర, త్రిచక్ర వాహనాలకు తొలి ప్రాధాన్యం ఇచ్చింది. అలాగే.. రాష్ట్రాలు, కేంద్ర పాలిత ప్రాంతాల రాజధానులు, 5 లక్షలకు మించి జనాభా కలిగిన నగరాల్లో రెండో దశలో బ్యాటరీ స్వాపింగ్ ప్రాజెక్టులు చేపట్టాలని పేర్కొంది. బ్యాటరీ కిలోవాట్హవర్ రేటింగ్ ఆధారంగా ప్రోత్సాహకాలు నిర్ణయించాలని తెలిపింది. సంబంధిత మంత్రిత్వ శాఖ లేదా విభాగం ద్వారా రాయితీలు ఇచ్చేందుకు సరైన వ్యవస్థ ఉండాలని సూచించింది.
ఇదీ చూడండి: డాట్సన్‌కు నిస్సాన్‌ గుడ్‌బై.. భారత్లో ఉత్పత్తి నిలిపివేత
విద్యుత్తు వాహనాల్లో మంటలు.. ఆ స్కూటర్ల రీకాల్!
