NPS ఖాతాదారులకు గుడ్ న్యూస్ - డబ్బు విత్​డ్రా రూల్స్ మారాయ్!

NPS New Withdrawal Rule : మీరు జాతీయ పింఛన్ పథకం(NPS) ఖాతాదారులా? అయితే మీకో గుడ్ న్యూస్. పెన్షన్ ఫండ్ నియంత్రణ సంస్థ (PFRDA).. నగదు విత్​డ్రా విషయంలో కొత్త రూల్ తీసుకొచ్చింది. మరి.. ఇంతకీ ఏంటా రూల్? ఎప్పటి నుంచి అమలులోకి వస్తుంది? ఏయే సందర్భాల్లో నగదు తీసుకోవచ్చు? అనే వివరాలు ఇప్పుడు చూద్దాం..

NPS New Rule For Pension Fund Withdrawal : వేతన జీవులకు రిటైర్​మెంట్ తర్వాత ఆర్థిక భరోసా అందించడం కోసం.. కేంద్ర ప్రభుత్వం తీసుకొచ్చిన పథకమే.. జాతీయ పింఛ‌ను ప‌థ‌కం(NPS). సాధారణ పౌరులకు కూడా ఈ స్కీమ్ అందుబాటులో ఉంది. ఇది ట్యాక్స్ ఆదా చేసుకునేందుకు మంచి రిటైర్​మెంట్ ఫండ్. అలాగే ఎన్​పీఎస్ దీర్ఘకాలంలో మంచి రాబడిని అందించే పెట్టుబడి సాధనం. కేంద్ర ప్రభుత్వ భరోసా ఉండడంతో ఎక్కువమంది దీనిలో పెట్టుబడి పెట్టడానికి ముందుకు వస్తుంటారు. అయితే.. NPS ఖాతాదారుల కోసం.. పెన్షన్ ఫండ్ నియంత్రణ సంస్థ (పీఎఫ్​ఆర్​డీఏ) ఓ కొత్త రూల్ తీసుకొచ్చింది. దీని ప్రకారం ఖాతాదారులు కొంత మేర డబ్బు ముందస్తుగా తీసుకునేందుకు ఛాన్స్ ఉంది. ఆ వివరాలు ఈ స్టోరీలో తెలుసుకుందాం.

పెన్షన్ ఫండ్ రెగ్యులేటరీ అండ్ డెవలప్‌మెంట్ అథారిటీ జారీ చేసిన సర్క్యూలర్ ప్రకారం.. ఎన్​పీఎస్ పింఛన్​దారులు తమ కార్పస్ ఫండ్ నుంచి 25 శాతం మేర డబ్బును పాక్షికంగా విత్​డ్రా చేసుకోవచ్చు. పీఎఫ్​ఆర్​డీఏ తీసుకొచ్చిన ఈ కొత్త రూల్ ఫిబ్రవరి 1 నుంచి అమలులోకి రానుంది. అయితే.. ఇందుకు కొన్ని నిబంధనలు ఉన్నాయి. ఆ కండీషన్స్ ప్రకారం మాత్రమే నగదు విత్​డ్రా చేసుకునే అవకాశం ఉంటుంది. అవేంటంటే..

• పిల్లల ఉన్నత చదువుల కోసం ఎన్​పీఎస్ ఖాతాదారులు పెన్షన్ ఫండ్ నుంచి 25 శాతం నగదు విత్​డ్రా చేసుకోవచ్చు.(చట్టబద్ధంగా దత్తత తీసుకున్న పిల్లలకూ ఈ రూల్ వర్తిస్తుంది)
• పిల్లల వివాహ ఖర్చుల కోసమూ డబ్బు తీసుకోవచ్చు.(చట్టబద్ధంగా దత్తత తీసుకున్న పిల్లలకూ ఈ రూల్ అమలవుతుంది)
• సబ్‌స్క్రైబర్ తన పేరుతో లేదా జీవిత భాగస్వామి పేరుపై నివాస గృహం లేదా ఫ్లాట్‌ను కొనుగోలు చేయడానికి, ఇంటి నిర్మాణం కోసం నగదు విత్​డ్రా చేయొచ్చు. అయితే.. ఖాతాదారుడి పేరుపై ఇప్పటికే ఇల్లు ఉంటే.. డబ్బు తీసుకోవడానికి అవకాశం లేదు.
• క్యాన్సర్, కిడ్నీ ఫెయిల్యూర్, ప్రైమరీ పల్మనరీ ఆర్టరీ హైపర్‌టెన్షన్, మల్టిపుల్ స్క్లెరోసిస్, మేజర్ ఆర్గాన్ ట్రాన్స్‌ప్లాంట్, కరోనరీ ఆర్టరీ బైపాస్ గ్రాఫ్ట్, ఇతర వ్యాధులకు వైద్య ఖర్చుల నిమిత్తం నగదు తీసుకోవచ్చు.
• చందాదారుడు వైకల్యంతో తలెత్తే వైద్యం, ఇతర ఖర్చుల కోసం జాతీయ పింఛన్ పథకం నుంచి డబ్బు విత్​డ్రా చేసుకోవచ్చు.
• ఏదైనా కొత్త స్టార్టప్ ఏర్పాటు చేసినప్పుడు దాని ఖర్చుల కోసం కూడా ఎన్​పీఎస్ నుంచి మనీ పొందవచ్చు.
• నైపుణ్యాభివృద్ధి కోసం చేపట్టే పనుల కోసం అయ్యే ఖర్చులకు సైతం డబ్బు తీసుకునే అవకాశం ఉంది.

కొత్త నిబంధనల ప్రకారం డబ్బు ఎలా ఉపసంహరించుకోవాలంటే..

• ఫిబ్రవరి 1 తర్వాత NPS ఖాతా నుంచి డబ్బులు పాక్షిక ఉపసంహరణ చేసుకోవడానికి.. ఎన్​పీఎస్ చందాదారులు తమ సంబంధిత ప్రభుత్వ నోడల్ కార్యాలయం లేదా పాయింట్ ద్వారా.. సెంట్రల్ రికార్డ్ కీపింగ్ ఏజెన్సీ (CRA)కి పైన పేర్కొన్న కారణాలతో సెల్ఫ్-డిక్లరేషన్‌ ఫామ్ సమర్పించాలి.
• ఖాతాదారుడు అనారోగ్యానికి గురైతే.. కుటుంబ సభ్యులు వారి తరపున డిక్లరేషన్‌ను సమర్పించాలి.
• ఆ తర్వాత CRA చందాదారుల బ్యాంక్‌తో 'పెన్నీ డ్రాప్' పరీక్షను నిర్వహిస్తుంది. ఆ తర్వాతే మొత్తం డబ్బు ట్రాన్స్​ఫర్ చేస్తుంది.

నగదు విత్​ డ్రాకు అర్హతలు..

• ఎవరైతే పెన్షన్ ఫండ్ నుంచి 25 శాతం డబ్బు తీసుకోవాలనుకుంటున్నారో.. వారు ఎన్​పీఎస్​లో సభ్యులై 3 సంవత్సరాలు కావాలి.
• గరిష్ఠంగా మూడు సార్లు మాత్రమే పాక్షిక విత్ డ్రా చేసుకునే అవకాశం ఉంటుంది.