న్యూయార్క్-దిల్లీ మధ్య ప్రయాణిస్తున్న ఎయిర్ ఇండియా విమానంలో వృద్ధురాలిపై ఓ ప్రయాణికుడు మూత్రం పోసిన ఘటనపై డైరెక్టరేట్ జనరల్ ఆఫ్ సివిల్ ఏవియేషన్(డీజీసీఏ) సీరియస్ అయ్యింది. ఈ ఘటనకు సంబంధించి ఎయిర్ఇండియా అధికారులు, సిబ్బందికి డీజీసీఏ గురువారం షోకాజ్ నోటీసులు జారీ చేసింది.
"విధి నిర్వహణలో నిర్లక్ష్యం వహించిన అధికారులు, సిబ్బందిపై ఎందుకు చర్యలు తీసుకోకూడదు? రెండు వారాల్లోగా మా నోటీసుకు ఎయిర్ ఇండియా సమాధానం చెప్పాలి. ఆ నివేదిక ఆధారంగా తదుపరి చర్యలు తీసుకుంటాం. ఎయిర్ ఇండియా వ్యవహారశైలి బాధ్యతాయుతంగా లేదు."
--డీజీసీఏ
అంతకుముందు ఈ ఘటనపై ఎయిర్ ఇండియా.. డీజీసీఏకు నివేదిక అందించింది. వృద్ధురాలు, ఆమెపై మూత్రం పోసిన వ్యాపారవేత్త పరస్పర అంగీకారంతో ఈ సమస్యను పరిష్కరించుకున్నారని తెలిపింది. అందుకే ఎయిర్ ఇండియా సిబ్బంది పోలీసులకు ఫిర్యాదు చేయలేదని పేర్కొంది. మహిళపై మూత్రం పోసిన వ్యాపారవేత్తపై 30 రోజులపాటు ఎయిర్ ఇండియా విమానాల్లో ప్రయాణించకుండా ఇప్పటికే నిషేధం విధించామని ఆ సంస్థ అధికారులు తెలిపారు. అలాగే ఈ ఘటనపై అంతర్గత కమిటీ రిపోర్టు రావాల్సి ఉందని చెప్పారు.
అసలేం జరిగిందంటే..
గత ఏడాది నవంబరు 26న న్యూయార్క్ నుంచి దిల్లీ వచ్చిన ఎయిర్ ఇండియా విమానంలో 70 ఏళ్ల వృద్ధురాలు బిజినెస్‌ క్లాసులో ఉండగా.. మద్యం మత్తులో ఉన్న ఓ ప్రయాణికుడు ఆమె సీటు దగ్గరకు వచ్చి ఆమెపై మూత్రం పోశాడు. ఆ తర్వాత కూడా అక్కడి నుంచి కదలకపోవడం వల్ల మరో ప్రయాణికుడు వచ్చి బలవంతంగా పంపించారు. భోజనం తర్వాత విమానంలో లైట్లు ఆర్పేసిన సమయంలో ఈ ఘటన జరిగింది. దీంతో ఆ మహిళ విమాన సిబ్బందికి ఫిర్యాదు చేశారు. ప్రయాణికుడి చర్య కారణంగా తన దుస్తులు, బ్యాగు తడిచిపోయాయని తెలిపారు. దీంతో సిబ్బంది ఆమెకు మరో జత దుస్తులు, స్లిప్పర్స్‌ ఇచ్చారు.
అలాంటిదే మరో ఘటన..
పారిస్- దిల్లీ మధ్య ప్రయాణిస్తున్న ఎయిర్ ఇండియా విమానంలో తప్పతాగిన ఓ ప్రయాణికుడు.. మహిళ దుప్పటిపై మూత్రం పోశాడు. ఈ ఘటన డిసెంబరు 6న జరిగింది. దిల్లీలోని ఇందిరాగాంధీ అంతర్జాతీయ విమానాశ్రయ అధికారులు ప్రయాణికుడిని అదుపులోకి తీసుకున్నారు. అయితే నిందితుడు మహిళకు రాతపూర్వకంగా క్షమాపణ చెప్పడం వల్ల అతనిపై చర్యలు తీసుకోలేదని విమానాశ్రయ అధికారులు తెలిపారు.
"ఎయిర్ ఇండియా విమానం డిసెంబరు 6న దిల్లీలోని ఇందిరాగాంధీ ఎయిర్పోర్ట్కు చేరుకుంది. ఓ ప్రయాణికుడు మద్యం మత్తులో సిబ్బంది సూచనలను పాటించడం లేదని.. మహిళా ప్రయాణికురాలి దుప్పటిపై మూత్రం పోశాడు. విమానాశ్రయంలో దిగగానే ప్రయాణికుడిని సీఐఎస్ఎఫ్ అధికారులు అదుపులోకి తీసుకున్నారు. అప్పుడు మహిళా ప్రయాణికురాలితో అతడు రాజీ కుదుర్చుకున్నాడు. అనంతరం నిందితుడు.. మహిళా ప్రయాణికురాలికి రాతపూర్వకంగా క్షమాపణ చెప్పాడు. అప్పుడు అతడిని విడిచిపెట్టాం. "
-- దిల్లీ విమానాశ్రయ అధికారులు
