స్టాక్ మార్కెట్లు గురువారం లాభాలతో ముగిశాయి. బీఎస్ఈ- సెన్సెక్స్ 260 పాయింట్ల లాభంతో 48,804 వద్ద స్థిరపడింది. ఎన్ఎస్ఈ- నిఫ్టీ 77 పాయింట్లు బలపడి 14,581 వద్ద ముగిసింది.
చివరి గంటలో లభించిన కొనుగోళ్ల మద్దతు లాభాలకు ప్రధాన కారణంగా తెలుస్తోంది. ఆర్థిక షేర్లు పుంజుకోవడం కూడా కలిసొచ్చినట్లు నిపుణులు చెబుతున్నారు.
ఇంట్రాడే సాగిందిలా
సెన్సెక్స్ 48,857 పాయింట్ల అత్యధిక స్థాయి: 48,010 పాయింట్ల అత్యల్ప స్థాయిలను నమోదు చేసింది.
నిఫ్టీ 14,597 పాయింట్ల గరిష్ఠ స్థాయి, 14,353 పాయింట్ల కనిష్ఠ స్థాయిల మధ్య కదలాడింది.
లాభనష్టాల్లోనివి ఇవే..
టీసీఎస్, ఐసీఐసీఐ బ్యాంక్, హెచ్డీఎఫ్సీ బ్యాంక్, డాక్టర్ రెడ్డీస్, హెచ్డీఎఫ్సీ షేర్లు ప్రధానంగా లాభాల్లో ఉన్నాయి.
మారుతీ, ఇన్ఫోసిస్, ఇండస్ఇండ్ బ్యాంక్, బజాజ్ ఫినాన్స్, అల్ట్రాటెక్ సిమెంట్, నెస్లే షేర్లు నష్టాలను నమోదు చేశాయి.
ఇతర మార్కెట్లు
ఆసియాలో ఇతర ప్రధాన మార్కెట్లలో టోక్యో, సియోల్ సూచీలు లాభాలను గడించాయి. షాంఘై, హాంకాంగ్ సూచీలు నష్టపోయాయి.
ఇదీ చదవండి: మార్చిలో 8 ఏళ్ల గరిష్ఠానికి టోకు ద్రవ్యోల్బణం
