కరోనా వైరస్ కొత్త స్ట్రెయిన్ వ్యాప్తిపై ఆందోళనలు దేశీయ మార్కెట్లను కుదిపేశాయి. బ్రిటన్లో ఆంక్షలు, ఐరోపా మార్కెట్లు నష్టాలతో ప్రారంభమవటం వల్ల దేశీయ మార్కెట్లు ఒక్కసారిగా కుప్పకూలాయి. సెన్సెక్స్ ఒకదశలో ఏకంగా 1,500 పాయింట్లకుపైగా నష్టపోయింది. చివరకు 1406 పాయింట్ల నష్టంతో 45,553 వద్ద స్థిరపడింది. బీఎస్ఈ-30లోని దాదాపు అన్ని షేర్లూ నష్టాల్లోనే ముగిశాయి.
- బొంబాయి స్టాక్ ఎక్స్చేంజి సూచీ సెన్సెక్.. 1406 పాయింట్ల నష్టంతో 45,553 పాయింట్ల వద్ద స్థిరపడింది.
- జాతీయ స్టాక్ ఎక్స్చేంజి సూచీ నిఫ్టీ.. 432 పాయింట్ల క్షీణతతో 13,328 పాయింట్ల వద్ద ముగిసింది.
భారీగా నష్టపోయిన ప్రధాన రంగాలు..
జాతీయ స్టాక్ ఎక్స్చేంజీలో దాదాపు అన్ని షేర్లూ నష్టాల్లోకి వెళ్లాయి. నిఫ్టీ పీఎస్యూ బ్యాంకు 4 శాతం, ప్రైవేటు బ్యాంకులు 2.2 శాతం, మెటల్ 3.8, ఆటో రంగం 2.8 శాతం మేర నష్టల్లోకి కూరుకుపోయాయి.
బ్రిటన్ సరిహద్దులు మూసివేస్తున్న వార్తలతో విమానయాన రంగం భారీగా నష్టపోయింది. స్పైస్జెట్ షేర్లు 9.5 శాతం, ఇంటర్గ్లోబ్ ఏవియేషన్ 6.4 శాతం మేర క్షీణించాయి. కొత్త వైరస్ భయంతో అంతర్జాతీయంగా చమురు ధరలు 3 శాతం మేర నష్టపోవటం వల్ల ఇంధన రంగమూ కుదేలైంది. ఓఎన్జీసీ 8.4, గేయిల్ 7.6, ఇండియన్ ఆయిల్ 6.8 శాతం, భారత్ పెట్రోలియం 5.3 శాతం మేరకు నష్టాల్లో ముగిశాయి.
ఇదీ చూడండి: పన్ను ఎగవేతకు అడ్డుకట్ట ఎలా?
