స్టాక్ మార్కెట్లు (Stock Market) వరుసగా రెండో సెషన్లోనూ నష్టాలను నమోదు చేశాయి. సోమవారం సెషన్లో బీఎస్ఈ-సెన్సెక్స్ (Sensex today) 525 పాయింట్లు తగ్గి 58,490 వద్ద స్థిరపడింది. ఎన్ఎస్ఈ-నిఫ్టీ (Nifty today) 188 పాయింట్ల నష్టంతో 17,396 వద్దకు చేరింది.
మార్కెట్ సూచీలు గరిష్ఠ స్థాయి వద్ద ఉన్న నేపథ్యంలో మదుపరులు అప్రమత్తంగా వ్యవహరించారు. లోహ, బ్యాంకింగ్, ఫార్మా షేర్లు భారీగా అమ్మకాల ఒత్తిడి ఎదుర్కొన్నాయి. ఫలితంగా సూచీలు ఈ స్థాయి నష్టాలను మూటగట్టుకున్నాయని విశ్లేషకులు చెబుతున్నారు.
ఇంట్రాడే సాగిందిలా (Intraday)..
సెన్సెక్స్ 59,202 పాయింట్ల అత్యధిక స్థాయి, 58,469 పాయింట్ల అత్యల్ప స్థాయిలను నమోదు చేసింది.
నిఫ్టీ 17,622 పాయింట్ల గరిష్ఠ స్థాయి, 17,389 పాయింట్ల కనిష్ఠ స్థాయిల మధ్య కదలాడింది.
లాభనష్టాల్లోనివి ఇవే..
హెచ్యూఎల్, బజాజ్ ఫిన్సర్వ్, ఐటీసీ, నెస్లే, హెచ్సీఎల్టెక్ లాభాలను గడించాయి.
టాటా స్టీల్ (10 శాతం), ఎస్బీఐ, ఇండస్ఇండ్ బ్యాంక్, హెచ్డీఎఫ్సీ, డాక్టర్ రెడ్డీస్ భారీగా నష్టపోయాయి.
ఇతర మార్కెట్లు
ఆసియాలో ఇతర ప్రధాన మార్కెట్లలో.. హాంగ్సెంగ్ (హాంకాంగ్) సూచీ నష్టాలతో ముగిసింది. షాంఘై (చైనా), నిక్కీ (జపాన్), కోస్పీ (దక్షిణ కొరియా) సూచీలు సెలవులో ఉన్నాయి.
ఇదీ చదవండి: గూగుల్ నుంచి 'ఒరిజినల్ ఆలు చిప్స్'- మీకూ కావాలా?
