దేశీయ మార్కెట్లపై అంతర్జాతీయ పరిణామాలు బలంగా పనిచేస్తున్నాయి. కరోనా వైరస్పై డబ్ల్యూహెచ్ఓ, అమెరికా అధ్యక్షుడు డొనాల్డ్ ట్రంప్ ప్రకటనల నేపథ్యంలో సెన్సెక్స్, నిఫ్టీ.. పతనాల్లో కొత్త రికార్డులను సృష్టిస్తున్నాయి.
ఉదయం నుంచి భారీ నష్టాల్లోనే స్టాక్ మార్కెట్లు ట్రేడవుతున్నాయి. సెన్సెక్స్ 2,216 పాయింట్ల పతనమై 33,481 పాయింట్ల వద్ద కొనసాగుతోంది. 662 పాయింట్లు కోల్పోయిన నిఫ్టీ 9,796 పాయింట్లకు పడిపోయింది.
ఇంట్రాడే అత్యధికం..
ఒకానొక దశలో ఇంట్రాడేలో సెన్సెక్స్, నిఫ్టీ అత్యంత భారీ పతనాన్ని నమోదు చేశాయి. పాత రికార్డులను బద్దలుకొడుతూ బీఎస్ఈ సూచీ 2,707 పాయింట్లు, ఎన్ఎస్ఈ సూచీ 810 పాయింట్లు కోల్పోయాయి.
సెషన్ ప్రారంభానికి ముందు బీఎస్ఈ మార్కెట్ విలువ రూ.137 లక్షల కోట్లుగా ఉంది. ఈ స్థాయి పతనాలతో మదుపరుల సంపద రూ.9.15 లక్షల కోట్లు హరించుకుపోయింది.
అన్ని నష్టాలే..
అన్నీ రంగాల షేర్లపై బేర్ విరుచుకుపడింది. యాక్సిస్ బ్యాంకు, ఎస్బీఐ, హీరో మోటోకార్ప్, ఐటీసీ, బజాజ్ ఆటో, మహీంద్రా అండ్ మహీంద్రా, టైటాన్ భారీ నష్టాల్లో ఉన్నాయి. ఎస్ బ్యాంకు షేర్లు 31 శాతం నష్టపోయాయి.
ట్రంప్ ప్రకటన..
ఐరోపాలో మృతుల సంఖ్య రోజురోజుకు పెరుగుతోన్న నేపథ్యంలో చాలా రోజుల తర్వాత ప్రజలను ఉద్దేశించి కీలక ప్రసంగం చేశారు ట్రంప్. బ్రిటన్ మినహా ఐరోపా దేశాలన్నింటికీ 30 రోజుల పాటు ప్రయాణాలను నిలిపేస్తున్నట్లు ప్రకటించారు.
కరోనా వైరస్ను అంతర్జాతీయ మహమ్మారిగా డబ్ల్యూహెచ్ఓ ప్రకటించిన తర్వాత ఆసియా మార్కెట్లు భారీగా పడిపోయాయి. ట్రంప్ చేసిన ప్రసంగం అనంతరం మరింత దిగజారాయి.
