కంపెనీల తొలి త్రైమాసిక ఫలితాల ప్రకటన దాదాపు ముగింపు దశకు చేరుకుంది. దీనితో స్టాక్ మార్కెట్లకు ఈ వారం అంతర్జాతీయ పరిణామాలు కీలకం కానున్నాయంటున్నారు విశ్లేషకులు. ఈ వారం మార్కెట్లు నాలుగు రోజులే పని చేయనున్న నేపథ్యంలో మదుపరులు ఆచితూచి వ్యవహరించే అవకాశం ఉన్నట్లు చెబుతున్నారు.
- మొహర్రం సందర్భంగా గురువారం స్టాక్ మార్కెట్లకు సెలవు.
ఆర్థిక అంశాల పరంగా చూస్తే.. సోమవారం టోకు ద్రవ్యోల్బణం గణాంకాలు విడుదల కానున్నాయి. ముఖ్యంగా ఈ లెక్కలు మార్కెట్లను ప్రభావితం చేయొచ్చని విశ్లేషకులు చెబుతున్నారు. విదేశీ సంస్థగత పెట్టుబడులు కూడా దేశీయ మదుపరుల సెంటిమెంట్పై ప్రభావం చూపొచ్చని అంటున్నారు.
ఇటీవల రికార్డులను తిరగరాస్తూ.. కొత్త గరిష్ఠాలకు చేరిన మార్కెట్ల జోరు ఇంకా కొనసాగొచ్చని మార్కెట్ నిపుణులు అభిప్రాయపడుతున్నారు.
"సానుకూల ఆర్థిక గణాంకాలు.. దేశార్థికం తేరుకుంటున్నట్లు సంకేతాలు ఇస్తున్నాయి. దీనితో దీర్ఘకాలంలో మార్కెట్లలో బుల్ జోరు కొనసాగే అవకాశం ఉంది. అయితే రానున్న రోజుల్లో స్వల్ప దిద్దుబాటు ఉండొచ్చు."
-వినోద్ నాయర్, జియోజిత్ ఫినాన్షియల్ సర్వీసెస్ పరిశోధనా విభాగాధిపతి
వీటన్నింటితో పాటు.. డాలర్తో పోలిస్తే రూపాయి విలువ, అంతర్జాతీయ మార్కెట్లో ముడి చమురు ధరలు, కరోనా కేసులు, వ్యాక్సినేషన్ వార్తలు కూడా మార్కెట్లను ప్రభావితం చేసే సాధారణ అంశాలుగా ఉండనున్నాయి.
ఇదీ చదవండి: మన కుర్రాళ్లు అల్లరోళ్లేం కాదు.. లెక్కలన్నీ పక్కా!
