ప్రభుత్వం ప్రైవేటీకరణకు ఎంపిక చేయనున్న రెండు బ్యాంకులు తమ ఉద్యోగుల కోసం స్వచ్ఛంద పదవీ విరమణ పథకాన్ని (వీఆర్ఎస్) ప్రకటించే వీలుందని విశ్వసనీయ వర్గాలు వెల్లడించాయి. అయితే వీఆర్ఎస్ ఆఫర్ బలవంతంగా ఉద్యోగులను తప్పించేందుకు కాదని.. ప్రైవేటీకరణకు ముందే మంచి ప్యాకేజీతో రిటర్మెంట్ కోరుకునే వారి కోసమేనని ప్రభుత్వ వర్గాలు చెబుతున్నట్లు తెలిసింది.
గతంలో పలు ప్రభుత్వ రంగ బ్యాంకుల విలీన ప్రక్రియకు ముందు కూడా వీఆర్ఎస్ను ప్రకటించడం గమనార్హం.
2021-22 బడ్జెట్ ప్రసంగంలో ఆర్థిక మంత్రి నిర్మలా సీతారామన్.. రెండు ప్రభుత్వ రంగ బ్యాంకులను, ఓ బీమా సంస్థను ప్రైవేటీకరించనున్నట్లు ప్రకటించారు. ఈ ప్రణాళికలో భాగంగా ప్రైవేటీకరణకు అనుగుణంగా ఉన్న బ్యాంకుల ఎంపిక బాధ్యతను నీతి ఆయోగ్కు అప్పగించింది కేంద్రం.
ఇందుకు సంబంధించి నీతి ఆయోగ్ నివేదికను ఇటీవల కేంద్రానికి సమర్పించింది. ఇందులో సెంట్రల్‌ బ్యాంక్, ఇండియన్‌ ఓవర్‌సీస్‌ బ్యాంక్ (ఐఓబీ)లను ప్రైవేటీకరణకు సిఫారసు చేసినట్లు తెలుస్తోంది.
అవసరమైన మార్పుల తర్వాతే..
నీతి ఆయోగ్ ప్రతిపాదనను.. పెట్టుబడులు, ప్రభుత్వ ఆస్తుల నిర్వహణ విభాగం (దీపమ్‌), ఆర్థిక సేవల విభాగం పరిశీలించి, చట్టపరంగా అవసరమైన మార్పులు చేస్తాయి. ప్రైవేటీకరణ ప్రక్రియ కాలపరిమితి కూడా ఈ మార్పులపైనే ఆధారపడి ఉంటుందని సంబంధిత వర్గాలు వెల్లడించాయి.
