జాతీయ ఉపాధి విధానానికి(ఎన్ఈపీ) డిసెంబర్ నాటికి తుది రూపు ఇవ్వాలని కేంద్ర కార్మిక, ఉపాధి మంత్రిత్వ శాఖ భావిస్తున్నట్లు తెలుస్తోంది. నాలుగు నూతన కార్మిక చట్టాలను అమలు చేస్తూ.. ఈ విధానాన్ని రూపొందించనున్నట్లు సమాచారం.
పారిశ్రామిక సంబంధాలు, సామాజిక భద్రత, వృత్తిపరమైన రక్షణ వంటి చట్టాలకు పార్లమెంట్ గత ఏడాది ఆమోదం తెలిపింది. అంతకుముందు ఏడాదే వేతన కోడ్ చట్టానికి ఆమోద ముద్ర వేసింది. ఇందుకు సంబంధించిన విధివిధానాలు రూపొందించింది కార్మిక శాఖ. అయితే మొత్తం నాలుగు చట్టాలను ఒకేసారి అమలు చేయాలనే ఉద్దేశంతో.. వేతన కోడ్ వాయిదా వేసింది. ఈ నాలుగు చట్టాలను 2021 ఏప్రిల్ నుంచి అమలు చేయాలని భావిస్తున్నట్లు తెలుస్తోంది.
దేశంలో ఉపాధి అవకాశాలు మెరుగుపరచడం, నైపుణ్యాభివృద్ధి, ఎంప్లాయ్మెంట్ ఇంటెన్సివ్ సెగ్మెంట్లోకి పెట్టుబడులు తీసుకురావడం వంటి వాటికి కావాల్సిన వ్యూహాలను రూపొందిచడం ఎన్ఈపీ ముఖ్య ఉద్దేశం.
ఈ కోడ్లు అమలైతే.. దేశంలో ఉన్న 50 కోట్లకుపైగా కార్మికులకు మేలు జరుగుతుందని కేంద్రం భావిస్తోంది.
ఇదీ చూడండి:నూతన కార్మిక చట్టాల పూర్తి వివరాలు ఇక్కడ చూడండి..
