భారత స్మార్ట్ ఫోన్ మార్కెట్లో షియోమీ అగ్రస్థానాన్ని నిలబెట్టుకుంది. ఈ ఏడాది రెండో త్రైమాసికంలో 3.7 కోట్ల స్మార్ట్ ఫోన్లు విక్రయించి 28శాతం మార్కెట్ వాటాతో ఈ స్థానాన్ని దక్కించుకుంది.
శాంసంగ్ 25 శాతం మార్కెట్ వాటాతో రెండో స్థానంలో ఉంది. ఒప్పో, వీవో, రియల్ మీ, వన్ప్లస్ సంస్థలకు 30 శాతం మార్కెట్ వాటా ఉన్నట్లు కౌంటర్పాయింట్ రీసర్చ్ సంస్థ తాజా నివేదికలో వెల్లడించింది.
శాంసంగ్ ఫోన్ల అమ్మకాలు గత ఏడాది రెండో త్రైమాసికంతో పోలిస్తే 7 శాతం తగ్గినప్పటికీ.. మార్చి త్రైమాసికంతో పోలిస్తే మాత్రం 30 శాతం వృద్ధి చెందాయి. శాంసంగ్ 'ఏ', 'ఎం' శ్రేణి ఫోన్లకు దక్కిన ఆదరణ ఇందుకు కారణం.
చైనా ఎలక్ట్రానిక్ దిగ్గజం హువావేపై అమెరికా నిషేధం ఆ సంస్థ అమ్మకాలపై భారీ ప్రభావమే చూపింది. గత ఏడాదితో పోలిస్తే హువావే మార్కెట్ విలువ కాస్త తగ్గింది. అయినప్పటికీ పది ఉత్తమ ఫోన్లలో హువావేకు చోటుందని కౌంటర్పాయింట్ పేర్కొంది.
జోరుకు కారణాలు...
దేశీయంగా స్మార్ట్ ఫోన్ల అమ్మకాలు భారీగా పెరిగాయి. ముఖ్యంగా కొత్త మోడళ్లు సరసమైన ధరలకు లభించడం, పాత మోడళ్లపై ధరలు తగ్గించడం వంటి అంశాలు అమ్మకాలకు ఊతమిచ్చాయి. ఆఫ్లైన్ మార్కెట్లకు బ్రాండెడ్ ఫోన్ల విస్తరణ కూడా అమ్మకాల వృద్ధికి మరో కారణం.
ప్రీమియం విభాగంలో 'వన్ప్లస్' టాప్
జనవరి-మార్చి త్రైమాసికంలో ప్రీమియం స్మార్ట్ ఫోన్ విభాగంలో ప్రథమ స్థానంలో ఉన్న శాంసంగ్ స్థానాన్ని రెండో త్రైమాసికంలో వన్ప్లస్ కైవసం చేసుకుంది. వన్ ప్లస్ 7 సీరిస్ ఫోన్లకు ఉన్న ఆదరణ ఇందుకు ప్రధాన కారణం.
ప్రీమియం విభాగంలో రియల్మీ, ఆసుస్, వన్ప్లస్, నోకియా మాతృ సంస్థ హెచ్ఎండీ గ్లోబల్ గత ఏడాదితో పోలిస్తే.. ప్రస్తుతం వేగంగా వృద్ధి చెందుతున్నాయని కౌంటర్పాయింట్ పేర్కొంది.
ఇదీ చూడండి: శాంసంగ్ గెలాక్సీ ఏ10 ఎస్ ఫీచర్లు ఇవే!
