టెలికాం దిగ్గజాలు వొడాఫోన్ ఐడియా (వీ), ఎయిర్టెల్ జూన్లోనూ భారీగా వినియోగదారులను కోల్పోయాయి. వీ అత్యధికంగా 48.2 లక్షల వినియోగదారులను.. ఎయిర్టెల్ 11.3 లక్షల మంది చందాదారులను కోల్పోయినట్లు టెలికాం నియంత్రణ సంస్థ 'ట్రాయ్' నెలవారీ నివేదికలో వెల్లడించింది. ఇదే సమయంలో రిలయన్స్ జియోకు మాత్రం 45 లక్షల వినియోగదారులు పెరిగినట్లు తెలిపింది.
దేశంలో మొత్తం మొబైల్ నెట్వర్క్ చందాదారులు జూన్లో 0.28 శాతం తగ్గి 114 కోట్లుగా ఉన్నట్లు ట్రాయ్ పేర్కొంది.
పట్టణ, గ్రామీణ ప్రాంతాల్లో జూన్ చివరి నాటికి వైర్లెస్ మొబైల్ చందాదారుల సంఖ్య వరుసగా.. 54.3 శాతం, 45.7 శాతంగా ఉన్నట్లు ట్రాయ్ వివరించింది.
నెట్వర్క్ల వారీగా యూజర్లు..
జూన్ చివరి నాటికి దేశీయ ప్రధాన టెల్కోలైన జియోకు మొత్తం 39.7 కోట్లు (+44.9 లక్షలు ), ఎయిర్టెల్కు 31.6 కోట్లు (-11.3 లక్షలు), వొడాఫోన్ ఐడియాకు 30.5 కోట్ల (-48.2 లక్షలు).. చొప్పున చందాదారులు ఉన్నట్లు ట్రాయ్ నివేదికలో తేలింది.
దేశంలో బ్రాడ్ బ్యాండ్ చందాదారుల సంఖ్య మే తో పోలిస్తే.. జూన్ నాటికి 2 శాతం పెరిగి.. 69.8 కోట్లకు చేరినట్లు ట్రాయ్ పేర్కొంది. మొత్తం బ్రాడ్ బ్యాండ్ యూజర్లలో 98.93 శాతం వాటా టాప్ 5 కంపెనీలదేనని తెలిపింది.
కంపెనీల వారీగా యూజర్లు..
రిలయన్స్ జియో ఇన్ఫోకామ్కు 39.83 కోట్లు, ఎయిర్టెల్కు 15.1 కోట్లు, వొడాఫోన్ ఐడియాకు 11.64 కోట్లు, బీఎస్ఎన్ఎల్కు 2.3 కోట్ల చొప్పున బ్రాడ్ బ్యాండ్ యూజర్లు ఉన్నట్లు ట్రాయ్ వివరించింది.
ఇదీ చూడండి:ఆ విమానాల్లో జియో మొబైల్ సేవలు- ప్లాన్లు ఇవే
