ఎయిర్​ఇండియా కొనుగోలుకు నేడు టాటా గ్రూప్ బిడ్!

అప్పుల్లో కూరుకుపోయిన ప్రభుత్వ రంగ విమాన సంస్థ కొనుగోలుకు టాటా గ్రూప్ సోమవారం ఆసక్తి వ్యక్తీకరణ బిడ్ దాఖలు చేసేందుకు సిద్ధమైనట్లు తెలుస్తోంది. బిడ్​ దాఖలుకు సోమవారం సాయంత్రంతో తుది గడువు ముగియనున్న నేపథ్యంలో టాటా గ్రూప్​ ఈ నిర్ణయం తీసుకున్నట్లు సమాచారం.

ప్రభుత్వ రంగ విమానయాన సంస్థ ఎయిర్​ఇండియా కొనుగోలుకు టాటా గ్రూప్ సోమవారం ఆసక్తి వ్యక్తీకరణ(ఈఓఐ) బిడ్​ దాఖలు చేయనున్నట్లు తెలుస్తోంది. టాటా సన్స్​కు మెజారిటీ వాటా ఉన్న ఎయిర్​ ఏషియా ద్వారా ఈ బిడ్ దాఖలు చేసే అవకాశముందని సమాచారం.

ఎయిర్​ఇండియా కొనుగోలుకు ఈఓఐ బిడ్ దాఖలు చేసేందుకు సోమవారం సాయంత్రం 5 గంటలకు గడువు ముగియనున్న నేపథ్యంలో టాటా గ్రూప్ బిడ్​ దాఖలుకు సిద్ధమైనట్లు విశ్వసనీయ వర్గాలు వెల్లడించాయి. ఇదే రోజు 200 మందితో కూడిన ఎయిర్​ఇండియా ఉద్యోగుల గ్రూప్ కూడా సంస్థ కొనుగోలుకు బిడ్ దాఖలు చేసే అవకాశాలు కనిపిస్తున్నాయి. ఇప్పటికే తమకు ఓ ఫినాన్షియర్ మద్ధతు ఉన్నట్లు ఉద్యోగుల గ్రూప్ ప్రకటించింది.

భారీ అప్పుల్లో కూరకుపోయిన కారణంగా ఎయిర్​ఇండియాను విక్రయించాలని ప్రభుత్వం ప్రయత్నిస్తున్న విషయం విదితమే.

ఇదీ చూడండి:డీజిల్ సెగ్మెంట్​లోకి మారుతీ రీ ఎంట్రీ!