స్టాక్ మార్కెట్లు నేడు నష్టాలతో ముగిశాయి. ఆర్థిక వ్యవస్థ మందగమనానికి సంకేతంగా సెప్టెంబరులో పారిశ్రామిక ఉత్పత్తి 4.3 శాతం తగ్గిందని అధికారిక గణాంకాలు స్పష్టం చేశాయి. వీటికి తోడు ఎస్బీఐ ఇటీవల విడుదల చేసిన సర్వేలో 2019-20 జీడీపీ 5 శాతానికే పరిమితం కావచ్చని అంచనా వేసింది. ఈ అంశాలు మదుపరుల సెంటిమెంట్ను దెబ్బతీశాయి.
బొంబాయి స్టాక్ ఎక్స్చేంజి సూచీ-సెన్సెక్స్ 229 పాయింట్లు కోల్పోయింది. చివరకు 40,116 వద్ద స్థిరపడింది. జాతీయ స్టాక్ ఎక్స్చేంజి సూచీ-నిఫ్టీ 73 పాయింట్లు క్షీణించి..11,840 వద్దకు చేరింది.
ఇంట్రాడే సాగిందిలా..
సెన్సెక్స్ 40,447 పాయింట్ల గరిష్ఠాన్ని తాకగా.. 40,016 పాయింట్ల కనిష్ఠాన్ని నమోదు చేసింది.
నిఫ్టీ నేడు 11,947 పాయింట్ల అత్యధిక స్థాయి.. 11,823 పాయింట్ల అత్యల్ప స్థాయిల మధ్య కదలాడింది.
లాభనష్టాల్లోనివి ఇవే..
టీసీఎస్ 3.76 శాతం, రిలయన్స్ 3.10 శాతం, హెచ్యూఎల్ 0.63 శాతం, మారుతీ 0.31 శాతం, ఎన్టీపీసీ 0.04 శాతం లాభాలను నమోదు చేశాయి. 30 షేర్ల ఇండెక్స్లో ఈ ఐదు షేర్లు మాత్రమే లాభపడ్డాయి.
ఎస్ బ్యాంక్ 6.51 శాతం, ఎస్బీఐ 3.69 శాతం, యాక్సిస్ బ్యాంక్ 3.18 శాతం, వేదాంత 2.82 శాతం, సన్ఫార్మా 2.34 శాతం నష్టాలను నమోదు చేశాయి.
ఇదీ చూడండి: ఇకపై ఫేస్బుక్లోనూ ఆన్లైన్ చెల్లింపులు!
