ఆర్థిక సంక్షోభంలో కూరుకుపోయి తాత్కాలికంగా మూతపడిన జెట్ ఎయిర్వేస్ ఉద్యోగులకు కాస్త ఊరట లభించింది. ఆ సంస్థకు చెందిన 500 మందికి ఉద్యోగాలు కల్పిస్తున్నట్టు స్పైస్జెట్ ప్రకటించింది. రానున్న రోజుల్లో మరింత మందిని సంస్థలోకి తీసుకుంటామని తెలిపింది.
జెట్ ఎయిర్వేస్ తాత్కాలిక మూసివేతతో ఏర్పడిన సామర్థ్య లోటును తీర్చేందుకు స్పైస్జెట్ చర్యలు చేపట్టింది. ఇందుకోసం 27 అదనపు విమానాలను తన శ్రేణిలో చేర్చింది స్పైస్జెట్. నియామకాల్లో జెట్ ఎయిర్వేస్ ఉద్యోగులకే తొలి ప్రాధాన్యమని స్పైస్జెట్ ఛైర్మన్, ఎండీ అజయ్ సింగ్ ఇప్పటికే ప్రకటించారు.
" మా సంస్థ విస్తరణలో భాగంగా అవసరాలు పెరుగుతాయి. అనుకోకుండా జెట్ ఎయిర్వేస్ మూతపడటం వల్ల ఉద్యోగాలు కోల్పోయిన వారికే మా మొదటి ప్రాధాన్యత. స్పైస్జెట్ ఇప్పటికే 100కు పైగా పైలెట్లు, 200కు పైగా క్యాబిన్ సిబ్బంది, 200కుపైగా సాంకేతిక, విమానాశ్రయ సిబ్బందిని నియమించుకుంది. మా సంస్థను మరింత వృద్ధి చేస్తాం. ఇందుకు పెద్ద సంఖ్యలో విమానాలను తీసుకురాబోతున్నాం. " - అజయ్ సింగ్, స్పైస్జెట్ ఛైర్మన్, ఎండీ
ముంబయి-దిల్లీ మధ్య 24 కొత్త విమాన సర్వీసుల సేవలను ప్రారంభిస్తామని ప్రకటించింది స్పైస్జెట్. ఈ నెల చివర లేదా మే మొదటి వారంలో ఈ సేవలు ప్రారంభించే అవకాశముంది.
ఇదీ చూడండి: 'బెల్ఫాస్ట్ ఫిల్మ్ ఫెస్టివల్'లో ఆమిర్ ఖాన్
