కరోనా విజృంభణతో దారుణంగా పతనమైన రంగాల్లో... విమానయానం కూడా ముఖ్యమైంది. కరోనా సంక్షోభం నుంచి తేరుకునేందుకు ఇప్పటికే చాలా సంస్థలు తమ ఉద్యోగుల సంఖ్యను తగ్గించుకుంటున్నట్లు ప్రకటించాయి. ఇప్పుడు ఆ జాబితాలో సింగపూర్ ఎయిర్లైన్స్ గ్రూప్ చేరింది.
ఈ సంస్థ తమ ఉద్యోగుల్లో 4,300 మందిని విధుల నుంచి తప్పించనున్నట్లు పేర్కొంది. కొవిడ్ తర్వాత విమానయాన రంగం గాడిన పడేందుకు చాలా సమయం పడుతుందని విశ్లేషకులు భావిస్తున్న నేపథ్యంలో ఈ నిర్ణయం తీసుకున్నట్లు పేర్కొంది.
సింగపూర్ ఎయిర్లైన్స్ సహా దాని అనుబంధ సంస్థ సిల్క్ ఎయిర్, బడ్జెట్ విభాగం స్కూట్లలో కలిపి ఊ మేరకు కోతలు ఉండనున్నట్లు తెలిపింది.
నియామకాల నిలిపివేత, స్వచ్ఛంద పదవీ విరమణతో.. సంస్థ లే ఆఫ్లు 2,400లుగా మాత్రమే ఉంటాయని సింగపూర్ ఎయిర్లైన్స్ వెల్లడించింది. ఇతర విమానయాన సంస్థలతో పోలిస్తే తమ కంపెనీ తీవ్ర సంక్షోభంలో ఉన్నట్లు తెలిపింది.
ఇతర విమానయాన సంస్థలకు ఉన్నట్లు భారీ దేశీయ మార్కెట్ పెద్దగా లేకపోవడం వల్ల భారీ నష్టాలు వస్తున్నట్లు తెలిపింది సింగపూర్ ఎయిర్లైన్స్. గ్రూప్ సంస్థలు జులై నెలలోనే 820 మిలియన్ డాలర్ల నష్టాన్ని మూటగట్టుకన్నట్లు పేర్కొంది.
ఇదీ చూడండి:టిక్టాక్ డెడ్లైన్ పొడగించే ప్రసక్తే లేదు: ట్రంప్
