రిలయన్స్ రిటైల్ వ్యాపారాల్లో ప్రముఖ ఈక్విటీ ఫండ్ సంస్థ సిల్వర్ లేక్ రూ.7.5 వేల కోట్లు పెట్టుబడులు పెట్టింది. ఫలితంగా 1.75 శాతం వాటాను అమెరికాకు చెందిన ఈ సంస్థ సొంతం చేసుకున్నట్లు రిలయన్స్ వెల్లడించింది.
ఈ ఒప్పందంతో రిలయన్స్ రిటైల్ విలువ రూ.4.21 లక్షల కోట్లకు పెరిగింది.
ఇటీవలే ఫ్యూచర్ గ్రూప్ను సొంతం చేసుకున్న రిలయన్స్ సంస్థ ఇప్పుడు.. ఇప్పుడు రిటైల్ వ్యాపారాల్లో వాటాల విక్రయానికి సిద్ధమైంది. ఈ నేపథ్యంలోనే సిల్వర్లేక్, రిలయన్స్ మధ్య చర్చలు జరిగాయి.
ఇప్పటికే సిల్వర్ లేక్ సంస్థ రిలయన్స్ జియోలో రూ.10,202.55 కోట్లు పెట్టి 2.08 శాతం వాటాను దక్కించుకుంది.
రిటైల్ వ్యాపారాలపై దృష్టి..
ఇటీవల జియో ప్లామ్లో భారీ మొత్తంలో వాటాలను ఫేస్బుక్ సహా ఇతర సంస్థలకు విక్రయించడం ద్వారా దాదాపు రూ.1.4 లక్షల కోట్లకుపైగా రాబట్టింది రిలయన్స్. ఆ తర్వాత ఇప్పుడు రిటైల్ వ్యాపారాలపై దృష్టి సారించింది.
ఇందులో భాగంగా ఫ్యూచర్ గ్రూప్ రిటైల్ వ్యాపారాల్లో మెజారిటీ వాటాను రూ.24,713 కోట్లతో ఇటీవలే సొంతం చేసుకుంది. జియో తరహాలోనే రిటైల్ వ్యాపారాల్లోనూ 10 శాతం వరకు వాటాను విక్రయించి భారీగా నిధులు సమకూర్చుకునేందుకు రిలయన్స్ ప్రయత్నిస్తున్నట్లు వార్తలొస్తున్నాయి.
దేశవ్యాప్త నెట్వర్క్..
రిలయన్స్ రిటైల్ వెంచర్స్ లిమిటెడ్లో భాగమైన రిలయన్స్ రిటైల్ లిమిటెడ్ దేశంలో వేగంగా విస్తరిస్తోంది. దేశవ్యాప్తంగా 12 వేల రిలయన్స్ రిటైల్ స్టోర్లు ఉన్నాయి. సుమారు 64 కోట్ల మంది రిలయన్స్ స్టోర్లను సందర్శిస్తున్నారని అంచనా.
ఇదీ చూడండి: రిలయన్స్ రిటైల్‌కు మరింత 'ఫ్యూచర్'
