ప్రముఖ ద్విచక్ర వాహనాల తయారీ సంస్థ రాయల్ ఎన్ఫీల్డ్ భారీ రీకాల్ ప్రకటించింది. మీటియర్, క్లాసిక్, బుల్లెట్ వంటి మోడళ్ల ఇగ్నీషన్ కాయిల్లో సాంకేతిక లోపాన్ని గుర్తించడమే.. రీకాల్కు కారణంగా వెల్లడించింది. మొత్తం 2,36,966 యూనిట్లను వెనక్కి రప్పిస్తున్నట్లు తెలిపింది.
భారత్ సహా.. ఇండోనేసియా, ఫిలిప్పీన్స్, థాయ్లాండ్, ఆస్ట్రేలియా, న్యూజిలాండ్, మలేసియా వంటి దేశాలకు ఎగుమతి చేసిన యూనిట్లను కూడా రీకాల్ చేస్తున్నట్లు తెలిపింది.
2020 డిసెంబర్ నుంచి 2021 ఏప్రిల్ ఉత్పత్తి అయిన మీటియర్, ఈ ఏడాది జనవరి- ఏప్రిల్ మధ్య విక్రయమైన క్లాసిక్, బుల్లెట్ మోడళ్లలో ఈ లోపం గుర్తించినట్లు రాయల్ ఎన్ఫీల్డ్ పేర్కొంది. ఇతర మోడళ్లలో సమస్యలు లేవని స్పష్టం చేసింది.
లోపాలు ఉన్న బైక్లు కొన్న వినియోగదారులను తమ డీలర్షిప్ ప్రతినిధులే సంప్రదిస్తారని రాయల్ ఎన్ఫీల్డ్ తెలిపింది. వినియోగదారులు కూడా దగ్గర్లోని డీలర్షిప్లను సంప్రదించడం ద్వారా తమ బైక్లో లోపం ఉందో లేదో తెలుసుకోవచ్చని వివరించింది.
ఇదీ చదవండి:బజాజ్, టాటా వాహనదారులకు గుడ్న్యూస్
