పబ్లిక్ ప్రావిడెంట్ ఫండ్ (పీపీఎఫ్) నిబంధనల్లో సవరణలు చేస్తూ.. నోటిఫికేషన్ విడుదల చేసింది కేంద్రం. ప్రావిడెంట్ ఫండ్ ఖాతాలో ఉన్న మొత్తాన్ని ఎటాచ్‌మెంట్‌ చేయటం ఇకపై వీలు కాదు. నిబంధనల్లో మార్పులు తక్షణమే అమల్లోకి వస్తాయని స్పష్టం చేసింది కేంద్రం. పీపీఎఫ్ ఖాతాదారులకు అనుకూలంగా ఈ మార్పులు ఉండటం గమనార్హం.
సవరించిన నిబంధనల ప్రకారం.. ఖాతాదారు బాకీ ఉన్న మొత్తాన్ని జమచేయటం కోసం దేశంలో ఏ కోర్టు ఆదేశాలు లేదా ఏ తీర్పుల ద్వారా కూడా పీపీఎఫ్ ఖాతాలో ఉన్న మొత్తాన్ని ఎటాచ్‌ చేయటం వీలుకాదు.
కొత్త నిబంధనల్లోని సారాంశం..
మెచ్యూరిటీ అనంతరమూ పీపీఎఫ్ ఖాతాను పొడిగించుకునే అవకాశం కలుగుతుంది. మెచ్యూరిటీ మొత్తాన్ని పొందినప్పటికీ ఖాతాదారు తన పీఎఫ్‌ ఖాతాను కొనసాగించుకోవచ్చు.
- ఖాతా తెరిచిన ఏడాది చివరి నుంచి పదిహేను సంవత్సరాల తర్వాత మరో ఐదు సంవత్సరాల వ్యవధి వరకు పీపీఎఫ్ ఖాతాను పొడిగించటానికి వీలవుతుంది.
- ఏ వ్యక్తి అయినా ఫారం 1 దరఖాస్తును సమర్పించి ప్రావిడెంట్ ఫండ్ ఖాతాను పొందవచ్చు. పీపీఎఫ్లో ఉమ్మడి ఖాతా తెరిచేందుకు వీలుకాదు.
- పీపీఎఫ్ ఖాతాదారు ఒక ఆర్థిక సంవత్సరానికి గాను కనీసం రూ.500 నుంచి గరిష్ఠంగా రూ.1.5లక్షల వరకు తమ ఖాతాలో జమచేసుకోవచ్చు.
- మైనర్‌ లేదా మానసిక స్థితి సరిగా లేకపోవటం వంటి అసాధారణ పరిస్థితుల్లో ఆ వ్యక్తి తరఫున ఎవరైనా సంరక్షకులు (గార్డియన్‌) దరఖాస్తు చేయవచ్చు. ఇటువంటి సందర్భాల్లో వారి పేరు మీద కేవలం ఒకే ఒక్క ఖాతాను తెరవటం వీలవుతుంది.
- సాధారణంగా ప్రావిడెంట్ ఫండ్ ఖాతా తెరిచిన ఏడాది చివరి నుంచి ఐదు సంవత్సరాల తర్వాత ఎప్పుడైనా ఖాతాదారు తన పీపీఎఫ్ సొమ్మును తిరిగిపొందవచ్చు. వారికి తమ ఖాతాలో ఉన్న సొమ్ములో 50 శాతం వరకు లభిస్తుంది.
ఇదీ చూడండి:భారత మార్కెట్లోకి రియల్మీ ఇయర్బడ్స్, ఎక్స్2 స్మార్ట్ఫోన్
