చిప్లతో కూడిన క్రెడిట్, డెబిట్ కార్డులను.. జారీ చేసిన బ్యాంకులు మరో కొత్త రకం కార్డులను తీసుకొచ్చాయని మీకు తెలుసా..? నియర్ ఫీల్డ్ కమ్యూనికేషన్(ఎన్ఎఫ్సీ) పేరుతో వీటిని అందుబాటులోకి తెచ్చాయి.
స్వైప్ లేకుండానే...
ఇప్పటివరకూ.. ఏదైనా కొన్న తర్వాత పీఓఎస్‌ యంత్రంలో కార్డును స్వైప్ చేసి, పిన్‌ను నమోదు చేస్తే ఆ లావాదేవీ పూర్తయినట్లే.
దీనికి భిన్నంగా స్వైపింగ్, పిన్ నమోదు చేయాల్సిన అవసరం లేకుండానే కార్డును అలా పైన తాకిస్తే చాలు. వెంటనే చెల్లింపు పూర్తవుతుంది. ప్రస్తుతానికి ఈ కార్డును రూ.2,000 విలువ వరకూ అనుమతిస్తున్నారు. అంతకుమించి చెల్లింపులకు పిన్ నమోదు తప్పనిసరి.
ఇది చాలా సులభం...
సాధారణ వాటితో పోలిస్తే ఈ ఎన్ఎఫ్సీ కార్డులు అత్యంత సురక్షితం. స్వైప్ చేయాల్సిన, పిన్‌ను పేర్కొనాల్సిన అవసరం ఉండదు. కాబట్టి, కీలకమైన సమాచారం బయటకు వెళ్తుందనే భయం ఉండదు. ఇంకా కార్డు ఎవరికీ ఇవ్వాల్సిన అవసరం కానీ ఉండదు. మీ కార్డు మీ చేతుల్లోనే ఉంటుంది. 4 సెంటీమీటర్ల దూరం నుంచే కార్డును గుర్తించి..లావాదేవీని పీఓఎస్‌ యంత్రం పూర్తి చేస్తుంది.
సాధారణంగా స్వైపింగ్, పిన్ నమోదు చేస్తే... ఒక కార్డు లావాదేవీకి 30 సెకండ్ల వరకూ సమయం పడుతుంది. కానీ.. ఎన్ఎఫ్సీ కార్డు ద్వారా కేవలం 3 సెకండ్లలోనే లావాదేవీని పూర్తి చేయొచ్చు. బిల్లు చెల్లింపు కోసం ఖాతాదారులు అధికంగా ఉన్నప్పుడు.. వ్యాపారులు, వినియోగదారులకూ ఈ కార్డుతో ఎంతో సమయం కలిసొస్తుంది.
ఎలా తీసుకోవాలి?
ఇటీవల చాలా బ్యాంకులు .. ఖాతాదారులకు కొత్త కార్డులను జారీ చేస్తున్నాయి. అందులో ఎక్కువగా ఈ ఎన్ఎఫ్సీ కార్డులే ఉంటున్నాయి. మీకు వచ్చిన కార్డు అలాంటిదో కాదో చూసుకోండి. దీనికోసం కార్డుపై ‘'వై-ఫై' ని పోలిన ఓ గుర్తు ఉంటుంది. ఒకవేళ లేకపోతే.. అలాంటి కార్డు కావాలని బ్యాంకును సంప్రదించండి.
