ఇటీవలే ముగిసిన రిలయన్స్ ఇండస్ట్రీస్ రూ.53,124 కోట్ల రైట్స్ ఇష్యూలో సంస్థ అధినేత ముకేశ్ అంబానీ 5.52 లక్షల షేర్లను దక్కించుకున్నారు. స్టాక్ ఎక్స్చేంజీలకు ఇచ్చిన సమాచారంలో ఈ విషయం పేర్కొంది రిలయన్స్ ఇండస్ట్రీస్. తాజాగా దక్కించుకున్న షేర్లతో రిలయన్స్లో ముకేశ్ అంబానీ వ్యక్తిగత వాటా 75 లక్షల షేర్ల నుంచి నుంచి 80.52 (0.12) లక్షల షేర్లకు పెరిగింది.
రిలయన్స్ తెలిపిన కీలకాంశాలు..
- ముకేశ్ భార్య నీతా అంబానీ, ఆయన కూతురు ఇషా, కొడుకులు ఆకాశ్, అనంత్లూ కూడా ఈ ఇష్యూలో 5.52 లక్షల వాటాలు దక్కించుకున్నారు. సంస్థలో వీరందరి వ్యక్తిగత వాటాలు కూడా 80.52 లక్షలకు పెరిగాయి.
- సంస్థ ప్రమోటర్ గ్రూప్ మొత్తం 22.50 కోట్ల షేర్లు దక్కించుకుంది. దీనితో సంస్థలో ప్రమోటర్ గ్రూపు వాటా 50.07 శాతం నుంచి 50.29 శాతానికి పెరిగింది.
- పబ్లిక్ షేర్హోల్డింగ్ వాటా 49.93 శాతం నుంచి 49.71 శాతానికి తగ్గింది.
- ప్రభుత్వ రంగ బీమా దిగ్గజం ఎల్ఐసీ ఈ రైట్స్ ఇష్యూలో 2.47 కోట్ల షేర్లు సబ్స్క్రైబ్ చేసుకుంది. దీనితో రిలయన్స్లో ఎల్ఐసీ వాటా 6 శాతానికి పెరిగింది. ప్రస్తుతం రిలయన్స్లో ఎల్ఐసీఐకి 37.18 కోట్ల షేర్లు ఉన్నాయి.
- పబ్లిక్ షేర్హోల్డర్లు ఈ ఇష్యూలో 19.74 కోట్ల షేర్లను దక్కించుకున్నారు.
