పీఎంసీ కుంభకోణంలో రూ.3,830 కోట్లు సీజ్​

పీఎంసీ కుంభకోణంలో భారీగా ఆస్తులను సీజ్​ చేసింది ఎన్​ఫోర్స్​మెంట్​ డైరెక్టరేట్​. కుంభకోణంలో ఆరోపణలు ఎదుర్కొంటున్న హెచ్​డీఐఎల్​, డైరెక్టర్లు, ప్రమోటర్లు, పీఎంసీ అధికారులకు చెందిన రూ.3,830 కోట్లు గుర్తించినట్లు వెల్లడించింది.

పంజాబ్, మహారాష్ట్ర సహకార బ్యాంకు మనీలాండరింగ్ కుంభకోణంలో భారీగా ఆస్తులను సీజ్​ చేసింది ఎన్​ఫోర్స్​మెంట్ డైరెక్టరేట్. హౌసింగ్ డెవలప్‌మెంట్ అండ్ ఇన్‌ఫ్రాస్ట్రక్చర్ లిమిటెడ్‌ (హెచ్​డీఐఎల్​) సహా దాని డైరెక్టర్లు, ప్రమోటర్లు, పీఎంసీ బ్యాంకు అధికారులకు చెందిన ఆస్తులను లెక్కిస్తున్నట్లు ఈడీ అధికారులు తెలిపారు.

ఈ ప్రక్రియలో రూ.3,830 కోట్లను సీజ్​ చేసినట్లు తెలిపారు. గుర్తించిన ఆస్తులను అక్రమ నగదు చలామణీ నిరోధక చట్టం కింద త్వరలోనే జప్తు చేయనున్నట్లు తెలిపారు.

ఇదీ కేసు..

పీఎంసీ బ్యాంక్ అధికారులు, హౌసింగ్​ డెవలప్​మెంట్​ ఇన్​ఫ్రాస్ట్రక్చర్ లిమిటెడ్-హెచ్​డీఐఎల్​ ప్రమోటర్లు కుమ్మక్కయి భారీ స్థాయిలో రుణ అక్రమాలకు పాల్పడ్డారన్నది ప్రధాన ఆరోపణ. ఈ అప్పుల వివరాలను ఆర్బీఐకి చెప్పకుండా బ్యాంక్ ఉన్నతాధికారులు దాచిపెట్టి.... నకిలీ ఖాతాలతో మోసగించారని ప్రాథమిక విచారణలో తేలింది. ఇలా పీఎంసీ బ్యాంక్​ నుంచి హెచ్​డీఐఎల్​ ప్రమోటర్లు రూ.6,500కోట్లు కాజేసినట్లు సమాచారం.

ఈ వ్యవహారం వెలుగులోకి వచ్చాక పీఎంసీ బ్యాంక్ కార్యకలాపాలపై ఆర్బీఐ ఆంక్షలు విధించింది. భారతీయ బ్యాంకింగ్ రంగ షేర్లు స్టాక్​మార్కెట్లలో తీవ్ర ఒడుదొడుకులు ఎదుర్కొన్నాయి.