టెలికాం సంస్థలు భారతీ ఎయిర్టెల్, వొడాఫోన్ ఐడియా లిమిటెడ్పై కఠిన చర్యలు తీసుకోవాలని కోరుతూ.. టెలికాం నియంత్రణ సంస్థ ట్రాయ్కు లేఖ రాసింది జియో. దుర్మార్గమైన, విభజనపూరిత ప్రచారం నిర్వహిస్తున్నాయని లేఖలో ఆరోపించింది. జియో నుంచి తమ నెట్వర్క్కు మారడం అనేది రైతు నిరసనలకు మద్దతు చర్యగా చూబుతూ.. ప్రజలను ప్రేరేపిస్తున్నాయని ఆగ్రహం వ్యక్తం చేసింది.
ప్రత్యుర్థుల చర్యలు జియో ఉద్యోగుల భద్రతను దెబ్బతీస్తాయని లేఖలో పేర్కొంది. రైతుల ఆందోళనలను సొమ్ము చేసుకునేందుకు అనైతిక, నిబంధనలకు విరుద్ధమైన మొబైల్ పోర్టబిలిటీ ప్రచారం నిర్వహించటం పట్ల ఇప్పటికే ఫిర్యాదు చేసినట్లు గుర్తుచేసింది జియో. ఇలాంటి ప్రచారం ఒక్క ఉత్తర భారతానికే పరిమితం కాలేదని, ఎంఎన్పీ ద్వారా వినియోగదారులను పొందేందుకు దేశవ్యాప్తంగా తప్పుడు ప్రచారం వ్యాప్తి చేస్తున్నారని ఆరోపించింది. ఎయిర్టెల్, వీఐఎల్ ప్రచార సందేశాలను సూచిస్తూ తమ వినియోగాదారులు పెద్ద సంఖ్యలో నంబర్లు పోర్ట్ చేస్తున్నారని ఆందోళన వ్యక్తం చేసింది. టెలికాం టారిఫ్ ఆర్డర్-1999 నిబంధనలను ఉల్లంఘిస్తున్నాయని స్పష్టం చేసింది.
ఖండించిన ఎయిర్టెల్, వీఐఎల్..
జియో చేసిన ఆరోపణలను ఖండించాయి ఎయిర్టెల్, వీఐఎల్లు. ఈ మేరకు ట్రాయ్కి లేఖ రాసింది భారతీ ఎయిర్టెల్. "ఈ నిరాధారమైన ఆరోపణలను మేము గట్టిగా తిరస్కరించాలనుకుంటున్నాం. మేము ఎల్లప్పుడూ మా వ్యాపారాన్ని మంచి వ్యక్తిత్వం, పారదర్శకతతో నిర్వహించాము," అని పేర్కొంది. నీతిగా ఉంటూనే వ్యాపారం చేయాలనేదానిని మా సంస్థ నమ్ముతుందన్నారు వొడాఫోన్ ఐడియా ప్రతినిధి. తమ ప్రతిష్ఠను దెబ్బతీసేందుకే నిరాధార ఆరోపణలు చేస్తున్నారని, తమ మీద చేసే బాధ్యతారాహిత్యమైన ఆరోపణలను తీవ్రంగా ఖండిస్తున్నామని పేర్కొన్నారు.
నాలుగేళ్ల తర్వాత..
నాలుగేళ్ల తర్వాత.. ఈ ఏడాది సెప్టెంబర్లో.. కొత్త వినియోగదారుల సంఖ్యలో జియోను వెనక్కి నెట్టింది ఎయిర్టెల్. ఈ ఏడాది సెప్టెంబర్లో ఎయిర్టెల్ 37.7 లక్షల మంది కస్టమర్లను చేర్చుకోగా.. ఆ తర్వాత జియో 14.6 లక్షల కొత్త కస్టమర్లను పొందింది. ఆ తర్వాతి స్థానంలో బీఎస్ఎన్ఎల్ 78,454తో ఉంది.
ఇదీ చూడండి: ఎయిర్ ఇండియా కొనుగోలుకు టాటా గ్రూప్ బిడ్
