సాధారణంగా కార్లు ఉన్నవాళ్లు ఎక్కువ సేపు అందులో తిరుగుతుంటారని అందరం భావిస్తుంటాం. అయితే అది తప్పని 'సెంటర్ ఫర్ సైన్స్ ఆండ్ ఎన్విరాన్మెంట్' చేసిన ఓ సర్వేలో వెల్లడైంది.
ఏడాది కాలం పాటు నిర్వహించిన ఈ సర్వే ప్రకారం.. దేశంలో కార్లు సగటున 95 శాతం సమయం పార్కింగ్లో ఉంటే 5 శాతం సమయం మాత్రమే రోడ్లపై నడుస్తున్నట్లు తెలిసింది. అంటే సగటున 8,360 గంటలు పార్కింగ్లో ఉంటే.. 400 గంటలు మాత్రమే నడుస్తున్నాయని సర్వే పేర్కొంది.
పార్కింగ్ కోసం పట్టణ ప్రాంతాల్లో బంజరు భూములకు ఎక్కువగా డిమాండ్ ఉన్న విషయాన్ని నివేదిక హైలెట్ చేసింది. సర్వే పేర్కొన్న గణాంకాల ప్రకారం.. అదనపు పార్కింగ్ స్థలం దిల్లీలో 471, చెన్నైలో 100, ఛండీగఢ్లో 58, గురుగ్రామ్లో 179 ఫుట్బాల్ మైదానాలకు సమానంగా ఉన్నట్లు తెలిసింది.
ఇదిలా ఉంటే.. పార్కింగ్ స్థలాల్లో కార్లు, ద్విచక్ర వాహనాలే 85 శాతం వాటాను ఆక్రమిస్తున్నాయి. అవి 4 నుంచి 15 శాతం ప్రయాణికుల అవసరాలను తీరుస్తున్నాయి. బస్సులు కేవలం 4-5 శాతం పార్కింగ్ వాటాను ఆక్రమిస్తూ.. కార్లు, బైకుల కన్నా.. 20 రెట్ల ఎక్కువ ప్రయాణికులను అవసరాలను తీరుస్తున్నట్లు సర్వే పేర్కొంది.
కార్లు కొనాలనుకునే వారికి పార్కింగ్ ఛార్జీలు ఒక సమస్యేనని పేర్కొన్న సర్వే.. ప్రపంచ వ్యాప్తంగా చూస్తే భారత్లోనే పార్కింగ్ రుసుములు తక్కువగా ఉన్నట్లు తెలిపింది. పార్కింగ్ ఛార్జీలు పెంచడం ద్వారా ఎక్కువ కార్ల సంఖ్య పెరగకుండా నిరోధించొచ్చని సీఎస్ఈ అభిప్రాయపడింది. కేవలం కార్ పార్కింగ్ కోసం ఉపయోగించే స్థలం..ఆర్థికంగా వెనకబడిన వారి ఇంటి స్థలానికి సమానంగా ఉంటోందని సర్వే అభిప్రాయపడింది.
పార్కింగ్ సమస్య పరిష్కారానికి..
- స్థానిక అవసరాలకు అనుగుణంగా పార్కింగ్ ప్రణాళిక రూపొందించాలి
- ప్రాంతాన్ని బట్టి పార్కింగ్ రుసుములు నిర్ణయించాలి
- అక్రమ పార్కింగ్లకు అధిక అపరాధ రుసుములు విధించాలి
ప్రజా రవాణాపై అవగాహన పెంచి.. సొంత వాహన వినియోగం తగ్గించాలి అని సీఎస్ఈ సూచించింది.
