భారత్లో కరోనాకు చెక్ పెట్టే లక్ష్యంతో రెమ్డెసివిర్ తయారీకి అనుమతి పొందిన ఫార్మా సంస్థ హెటిరో 'కొవిఫిర్' పేరుతో వైరస్ నిరోధక ఔషధాన్ని విడుదల చేసింది. ఈ మందును దేశవ్యాప్తంగా రూ. 5,400కు అమ్మనున్నట్లు చెప్పింది. ఇప్పటికే 20,000 డోసులను సిద్ధం చేసిన హెటిరో 10,000 డోసులను వైరస్తో తీవ్రంగా ప్రభావితమవుతున్న దిల్లీ, గుజరాత్, తమిళనాడు, హైదరాబాద్, ముంబయి సహా మహారాష్ట్రలోని ఇతర ప్రాంతాల్లో అందుబాటులో ఉంచనున్నట్లు పేర్కొంది. మరో 10,000 డోసులను కోల్కతా, ఇండోర్, భోపాల్, లఖ్నవూ, పట్నా, భువనేశ్వర్, రాంచీ, విజయవాడ, కొచ్చిన్, త్రివేండ్రం, గోవాకు సరఫరా చేయనున్నట్లు స్పష్టం చేసింది.
"కొవిఫిర్ భారత్లో విడుదల కావడం ఒక మైలురాయిగా చెప్పవచ్చు. ఈ మందు తీసుకోవడం ద్వారా కరోనా చికిత్సా కాలం తగ్గుతుందని భావిస్తున్నాం. తద్వారా ఆసుపత్రులపై ఒత్తిడి తగ్గుతుందని అనుకుంటున్నాం."
- శ్రీనివాస రెడ్డి, హెటిరో ఫార్మా ఎండీ
ప్రభుత్వ, ప్రైవేటు ఆసుపత్రుల్లో ఈ ఔషధాన్ని అందుబాటులోకి ఉంచాలని యోచిస్తున్నట్లు చెప్పారు శ్రీనివాసరెడ్డి. ఈ నెల 21న హెటిరో సంస్థకు కొవిఫిర్ ఉత్పత్తికి కేంద్ర ఆరోగ్య శాఖ అనుమతించినట్లు పేర్కొన్నారు.
హెటిరోతో పోలిస్తే సిప్లా ధర తక్కువ!
ఔషధ దిగ్గజం సిప్లా తాను విడుదల చేసే రెమ్డెసివిర్ డోస్ ధర రూ. 5000 కంటే తక్కువే ఉంటుందని.. రాబోయే 8 నుంచి 10 రోజుల్లో మార్కెట్లోకి తమ రెమ్డెసివిర్ ఔషదాన్ని తీసుకొస్తామని చెప్పింది.
ఇదీ చూడండి: హిందుజా సోదరుల మధ్య ఆస్తి వివాదం!
