రిలయన్స్ జియోలో పెట్టుబడులు పెట్టేందుకు సామాజిక మధ్యమ దిగ్గజం ఫేస్బుక్ సిద్ధమైంది. జియో ప్లాట్ఫాం లిమిటెడ్లోని మైనారిటీ(10శాతం) వాటా కొనుగోలు చేయనున్నట్లు తెలిపింది. ఈ మేరకు జియో ప్లాట్ఫాంలో 5.7 బిలియన్ డాలర్ల(రూ.43,574 కోట్ల)ను పెట్టుబడి పెట్టనున్నట్లు ఓ ప్రకటనలో తెలిపింది.
"రిలయన్స్ ఇండస్ట్రీస్ భాగస్వామ్య సంస్థ జియో ప్లాట్ఫాం లిమిటెడ్లో 5.7 బిలియన్ డాలర్లు(రూ.43,574కోట్ల)ను పెట్టుబడి పెట్టనున్నట్లు ప్రకటిస్తున్నాం. దీంతో జియోలో ఫేస్బుక్ అతిపెద్ద మైనారిటీ వాటాదారుగా అవతరిస్తుంది."-ఫేస్బుక్ ప్రకటన
రిలయన్స్ సంస్థ మరో ప్రకటనలో ఈ విషయాన్ని ధ్రువీకరించింది. పెట్టుబడి కోసం జియో ప్లాట్ఫాం విలువ 4.62 లక్షల కోట్లుగా లెక్కగట్టినట్లు తెలిపింది. ఫేస్బుక్ పెట్టుబడిని జియో ప్లాట్ఫాంలో 9.99 శాతం వాటాగా అనువదించనున్నట్లు ప్రకటించింది.
ప్రస్తుతం జియో ప్లాట్ఫాం పూర్తిగా రిలయన్స్ ఇండస్ట్రీస్ అధీనంలో ఉంది. సంస్థ డిజిటల్ సేవలు సహా 38.8 కోట్ల చందాదారులతో దేశంలో అతిపెద్ద నెట్వర్క్గా అవతరించిన రిలయన్స్ జియో సైతం జియో ప్లాట్ఫాం పరిధిలో ఉన్నాయి.
ఇదీ చదవండి: 12 రాష్ట్రాల్లోనే 92 శాతం 'వైరస్' కేసులు
